Rayon Sports y’Abagore yegukanye Igikombe cy’Amahoro cya 2023/24 (Amafoto)

Uyu mukino wabereye kuri Kigali Pelé Stadium, ku wa Kabiri, tariki ya 30 Mata 2024.

Rayon Sports yinjiye mu mukino hakiri kare ndetse ibifashijwemo na Mukandayisenga Jeannine uzwi nka Kaboy, itsinda Indahangarwa WFC yo mu Karere ka Kayonza.

Kaboy yatsinze igitego cya mbere ku munota wa 12, yongeramo icya kabiri ku wa 15, ndetse amakipe yombi ajya kuruhuka Rayon Sports iri imbere n’ibitego 2-0.

Mu gice cya kabiri, Kaboy yanyeganyeje inshundura inshuro ebyiri zirimo igitego yinjije ku munota wa 53 n’icyo yatsinze nyuma yo gucenga umunyezamu w’Indahangarwa Iradukunda Gisèle.

Umukino warangiye ari ibitego bine bya Rayon Sports, ku busa bwa Indahangarwa yo mu Burasirazuba. Gikundiro y’Abagore yahise yegukana igikombe cya yo cya mbere cy’Amahoro.

Rayon Sports yahiriwe n’uyu mwaka w’imikino kuko yawegukanyemo n’Igikombe cya Shampiyona ya 2023/2024.

AS Kigali WFC ni yo yegukanye umwanya wa gatatu nyuma yo gutsinda Fatima WFC ibitego 4-1 mu mukino wabereye kuri Stade Mumena.