Ingabo z’u Rwanda zigaruriye ibirindiro by’ibyihebe bya Mbau muri Mozambique

Kuri uyu wa Gatanu, ingabo z’ u Rwanda zifatanije n’iza Mozambique, nyuma yo kwigarurira ibirindiro by’icyicaro gikuru  cy’ibyihebe cy’Umujyi  wa Mocimboa Da Praia, zakomeje kubakurikira ari nako zibagabaho  ibitero aho byahungiye mu Majyepfo ahitwa Mbau mu birometero bisaga 50, aho ibi byihebe byari byimuriye ibirindiro.

Kuri ubu Ingabo z’u Rwanda zigaruriye ibindi birindiro by’ibyihebe by’ahitwa Mbau.

Mu birometero nka bitanu utarinjira Mbau, ingabo z’u Rwanda zasakiranye n’umutwe w’ibyihebe biri hagati ya 80-100, habera imirwano ikomeye yarangiye ibyihebe bikubiswe inshuro ndetse bihatakariza abarwanyi 11 n’ibikoresho birimo imbunda za SMG n’ibindi bikoresho.

Mu byerekezo ibyihebe bikomeje guhunga bineshejwe nk’urugero ahitwa muri Nagitenge utaragera Mbau, byatemaga ibiti binini bakabihirika mu mihanda kugira ngo bagabanye umuvuduko w’ingabo z’u Rwanda.

Iyo mikorere yabyo yabaye impfabusa kuko ibyo biti bigenda bikurwa mu nzira hifashishijwe imodoka z’intambara,  n’imashini zabugenewe,  urugendo rugakomeza.

Ingabo z’u Rwanda zifatanije n’iza Mozambique zikaba zikomeje gukurikirana ibi byihebe kugira ngo byamburwe ahantu hose zifashisha mu guhungabanya umutekano w’abaturage.