Rulindo: Ba mukerarugendo ntibakirenga aho bita "ku kirenge cya Ruganzu"

Abasura ikigo ndangamurage cya Rulindo cyitwa “Ikirenga Cultural Center” baratangaza ko ari ikimenyetso gikomeye cy’umwimerere w’amateka n’umuco Nyarwanda. Icyo kigo cyubatswe ahazwi nko:”Ku Kirenge cya Ruganzu”, ubuyobozi bw’akarere ka Rulindo buvuga ko ari urugero rw’uko buri karere kose gashobora kubaka ibimenyetso bidasibangana by’amateka yakaranze bigafasha abaturage kuyamenya.

Uretse kuba hamurikirwa amateka n’ubudasa bwinshi bwo mu duce twahoze ari Ububeruka, ubumbogo, u Busigi n’izindi mpugu zari zigize aho Rulindo iherereye, muri iki gihe hamurikirwa imikino idasanzwe nk’ubukwe bwa Kinyarwanda, ivuka rya Ruganzu n’iyimikwa ry’ingoma Karinga hakagurishirizwa n’ibihangano by’umwimerere nyarwanda.