Urubyiruko rw'abanyeshuri mu marushanwa ajyanye n'inama ya CHOGM

Urubyiruko ruri mu mashuri rwagaragaje ko rumaze gusobanukirwa intego n'imiterere y'inama y'abakuru b'ibihugu na za Guverinoma baturuka mu bihugu bikoresha ururimi rw'icyongereza.

Urubyiruko rusaga 100 ruturutse mu bice bitandukanye by'igihugu rwahize abandi ku marushanwa yimikorere y'umuryango wa Commonwealth ni rwo rwahuriye i Kigali mu biganiro, aho rwishyize mu mwanya w'abakuru b'ibihugu bihuriye muri  uyu muryango,aho buri umwe yatangaga ibitekerezo nk'umukuru w'igihugu.

Minisitiri w'Uburezi Dr Uwamariya Valentine avuga ko urubyiruko rukiri mu mashuri rufite ubumenyi buhagije ku muryango w'ibihugu bikoresha ururimi rw'icyongereza.

Yagize ati "Ubumenyi barabufite kubera ko bariteguye, bakoze n'ubushakashatsi kuko baraturuka mu gihugu hose kuko mu turere hose bavuyeyo bakoze ubushakashatsi bamenya uburyo iyi nama itegurwa, bamenya ibitekerezo bitangwamo ngira ngo mwabibonye ko bafite amakuru ahagije kuri CHOGM kugera n'aho bamenya uko inama y'abakuru b'ibihugu uko iba ihagaze birashimishije kuko bari ku rugero rwiza."

Uru rubyiruko rwari ruri mu cyimbo cy'ibihugu bihuriye mu muryango w'ibihugu bikoresha ururimi rw'icyongereza uko ari 54 maze rugatanga rukagaragaza inzitizi zigaragara mu muri ibi bihugu n'imyanzuro iganisha ku bisubizo by'ibyo bibazo.