Umusirikare wa DRC yarasiwe ku mupaka w'u Rwanda

Mu gitondo cyo kuri uyu wa Gatanu tariki 17 Kamena 2022 mu Karere ka Rubavu, umusirikare wa DRC yarasiwe ku kubata bw'u Rwanda arapfa.

Uyu musirikare utamenyekanye imyirondoro ye wari witwaje imbunda yo mu bwoko bwa AK 47 yinjiye ku mupaka w'u Rwanda wa Petite Barrière uherereye mu Karere ka Rubavu, arasa ku bashinzwe umutekano ku mu paka ku ruhande rw'u Rwanda ndetse n'abaturage bambukaga, maze akomeretsa abapolisi babiri b'u Rwanda.

Itangazo ry'Ingabo z'u Rwanda ryasohotse kuri uyu wa Gatanu, rivuga ko mu kwitabara no kurinda abaturage bambukaga ndetse n'abakorera ku mupaka, umupolisi w'u Rwanda wari uri ku burinzi yahise amurasa arapfa.

RDF ivuga ko uyu musirikare wa DRC yari yinjiye ku butaka bw'u Rwanda ho metero 25.

Ivuga ko yahise ihamagara Urwego ruhuriweho n’ibihugu byo muri ICGLR, rushinzwe kugenzura imipaka (EJVM) ngo rukore iperereza.

U Rwanda kandi rwamenyesheje uruhande rwa DRC ndetse n'abayobozi bo ku mupaka w'impande zombi banasura aho byabereye.

Ingabo z'u Rwanda ziravuga ko kugeza ubu ku mupaka umutekano ari wose.

Inzego z’umutekano hagati y’u Rwanda na DRC ubwo zageraga ku mupaka zitegereje JMV kugira ngo zitware umurambo w’umusirikare wa Congo warasiwe ku butaka bw’u Rwanda.

Itangazo ry'Ingabo z' u Rwanda ku iraswa ry'umusirikare wa DRC 

Jean Paul Niyonshuti