Umusaruro w'ubumwe n'ubwiyunge mu batuye i Fumbwe

Abatuye i Fumbwe mu Karere ka Rwamagana basanga gahunda y’ubumwe n’ubwiyunge yarimakaje imibanire myiza hagati y’abarokotse jenoside yakorewe abatutsi na bamwe mu bayigizemo uruhare, bikaba umusemburo w’iterambere rikataje muri aka gace.

Rurangwa Innocent yavukiye i Fumbwe mu Karere ka Rwamagana aho yatuye kugeza mu 1992 ubwo yahungaga itotezwa ryakorerwaga abatutsi muri ako gace. Yasize abana batanu n’umugore ariko agarutse nyuma ya jenoside yakorewe abatutsi yasanze bose barishwe.

Inyigisho z’ubumwe n’ubwiyunge zafashije Rurangwa Innocent gukira ibikomere maze yiyemeza gufasha bamwe mu bagize uruhare muri jenoside yakorewe abatutsi anabagabira inka.

Mwitakuze Diyoniziyo ni umwe mu bagize uruhare muri jenoside wafashijwe na Rurangwa Innocent ubwo yari afunguwe, ubu nawe ahamya inyungu ziri mu bumwe n’ ubwiyunge.

Imyaka 27 nyuma ya jenoside yakorewe abatutsi, Fumbwe ni agace kagaragaramo impinduka nyinshi mu iterambere ndetse gatangiye gufata isura y’umujyi , ibintu abahatuye babona nk’umusaruro wa politiki nziza ihuza abanyarwanda.