Umusaruro w'ubukerarugendo mu Rwanda urazamuka ku rwego rushimishije

Yanditswe Nov, 03 2023 11:41 AM | 62,675 Views

Abakora muri serivisi zifitanye isano n'ubukerarugendo bavuga ko muri iki gihe hagenda hongerwa ibikorwa bitanga bene isi serivice bikorohera abazikeneye.

Uru rwego rw'ubukerarugendo rwihariye hafi 50% by'umusaruro mbumbe w'igihugu aho urwego rw’igihugu rushinzwe iterambere, RDB, ruvuga ko kuba Abanyamahanga basura u Rwanda bahabwa visa binjiye mu Rwanda nabyo bizongera umubare w'abarusura.

Imibare y’ikigo cy’ibarurishamibare igaragaza ko mu gihembwe cya mbere cy’uyu mwaka umusaruro mbumbe w’igihugu wazamutse ku gipimo cya 9.2%, urwego rwa serivisi rwiyongereyeho 13%, umusaruro w’amahoteli na resitora wonyine wo wazamutse ku gipimo cya 42%.

Inama zakiriwe n'u Rwanda mu mezi 6 ya mbere y'uyu mwaka zatumye amafaranga atangwa n'urwego rw'ubukerarugendo mu musaruro mbumbe w'igihugu azamukaho 44%.

Abatanga serivisi zifitanye isano n'ubukerarugendo bavuga ko ubwiyongere bwazo hirya no hino mu gihugu bitanga icyizere ko ibintu bigenda bigaruka mu buryo nk’uko byahoze mbere ya COVID19.

Umwaka ushize wa 2022 ibikorwa by'ubukerarugendo byinjije miliyoni 445 z’amadolari ugereranyije na miliyoni 164 z’amadolari yinjiye muri 2021, bisobanuye inyongera ya 171.3%. nk’uko bitangazwa na RDB.

Abaturiye amapariki by'umwihariko pariki y'ibirunga bishimira ko igihugu kibagenera 10% by'amafaranga ava mu bikorwa by'ukukerarugendo.

Umuyobozi mukuru w'urwego rw'igihugu rw'iterambere/RDB Francis Gatare ashimangira ko igihugu gikomeje gukora byinshi bigamije guteza imbere ubukerarugendo, aho yizera ko kwemerera abanyamahanga guhabwa visa binjiye mu Rwanda nabyo bizongera umubare w'abarusura.

Kwiyongera kw’amafaranga akomoka ku rwego rw'ubukerarugendo na serivisi zibushingiyeho, ni ikimenyetso cy’uko burimo gusubira uko bwari mbere y’icyorezo cya COVID19.

Mu mwaka wa 2019 nibwo bwa mbere u Rwanda rwinjije amafranga menshi ava mu bukerarugendo kuko yageze kuri miliyoni 500 z'amadolari, ni mu gihe intego ari ukwinjiza miliyoni 600 z'amadolari muri uyu mwaka.