Ubushinjacyaha bwasabiye Sankara gufungwa imyaka 25

Ubushinjacyaha bwasabiye Sankara gufungwa imyaka 25

Kuri uyu wa Gatatu, ubushinjacyaha bwasabiye Nsabimana Callixte (Sankara) gufungwa imyaka 25 muri gereza, ndetse ibyangombwa bihimbano birimo indangamuntu n’impapuro z’inzira yaherewe mu gihugu cya Lesotho akabinyagwa.

Muri uru rubanza urukiko rwahaye ubushinjacyaha umwanya ngo busubize ibyavuzwe n’abaregwa n’ababunganira, mu gihe bisobanuraga ku byaha bakurikiranyweho.

Ubushinjacyaha bwahereye kuri Nsabimana Callixte (Sankara) watangiye kwiregura yemera ibyaha ku itariki 28 Mutarama 2020.

Ubushinjacyaha bwagaragaje ko Nsabimana Callixte yari akwiye guhanishwa igihano ntarengwa cyo hejuru giteganyijwe ku cyaha kirusha ibindi gukomera ari cyo gufungwa burundu.

Ariko bushingiye ku mpamvu nyoroshyacyaha eshatu zirimo kuba yaremeye ibyaha akurikiranyweho, kuba yaratanze amakuru menshi yifashishijwe mu iperereza ndetse no kuba ari ubwa mbere akurikiranywe mu nkiko, bwamusabiye igihano kigabanyije cyo gufungwa imyaka 25.

Bwasabye kandi ko ibyangombwa bihimbano birimo indangamuntu n’impapuro z’inzira by’igihugu cya Lesotho ndetse na telephone 3 yakoreshaga binyagwa.

Abaregera indishyi muri uru rubanza rwa Rusesabagina n’abo bareganwa, ni bo babanje gutanga ubuhamya bw’uko ibitero by’abarwanyi ba MRCD-FLN mu ishyamba rya parike ya Nyungwe no mu nkengero zayo byahitanye ubuzima bwa bamwe abandi babikurizamo ubumuga n’uburwayi bakivuza:

Iburanisha ritaha ryashyizwe kuri uyu wa Kane mu gitondo saa mbiri n’igice, humvwa ubushinjacyaha ku bwiregure bw’abandi baregwa buhereye kuri Nsengimana Herman wasimbuye Nsabimana Callixte ku mwanya w’umuvugizi w’umutwe wa MRCD-FLN.

Paul Rutikanga