Uburyo abahoze mu burembetsi muri Nyagatare bahinduriwe ubuzima

Mu karere Nyagatare Abaturage bahoze mu bikorwa byo kwambutsa ibiyobyabwenge na Magendu, barashishikariza bagenzi babo bakibirimo kubireka nyuma yo guhabwa akazi ko gutunganya imihanda yangiritse muri aka karere

Abahoze mu burembetsi uko ari 3000 bamaze amezi ane bahawe imirimo yo gutunganya imihanda yangiritse yo mu mirenge itandatu ariyo, Kiyombe ,Rwempasha ,Karama ,Tabagwe ,Matimba na Musheri bakorera amafaranga ibihumbi bibiri ku munsi kandi ngo iyi mirimo yahinduye imibereho yabo

Hari n’abaturage bandi bajyaga guca inshuro mu bihugu by’abaturanyi, ariko ngo ubwo bazaga gusura imiryango yabo baje guhabwa nabo akazi muri iyi mirimo yo gusana imihanda ubu  nabo barashimira leta y'u Rwanda yabashyiriyeho aka kazi

Mu byatunganijwe n’abaturage harimo n’inzira za panya banyuzagamo ibiyobyabwenge.

Umuyobozi w'akarere ka Nyagatare, Mushabe David Claudian yemeza ko abakiri mu burembetsi  bakwiye kubureka kuko akarere kiteguye kubaha imirimo yo gukora, kandi ibabyarira inyungu kurusha uburembetsi

Mu mpera z'ukwezi kwa Gatanu uyu mwaka, ubwo Minisitiri w’Ubutegetsi bw'Igihugu, Gatabazi Jean Marie Vianney yatangizaga kumugaragaro iyi mirimo, yari yasabye ababaturage gukoresha aya mahirwe bagahanga imirimo ibabyarira inyungu

Ibyo Minisitiri Gatabazi yasabye aba baturage byatangiye kugerwaho, kuko hari bakoresheje amafaranga bakuye muri iyi mirimo bakaguramo amatungo abandi bakayakoresha mu bikirwa by’ubuhinzi .

Maurice Ndayambaje