Ubukerarugendo bwasubukuwe i Rubavu

Bamwe mu bakora mu rwego rw'ubukerarugendo mu Mujyi wa Rubavu baravuga ko bagizweho ingaruka n'imitingito yibasiye aka gace mu minsi ishize, ariko ubu bamaze gusubukura ibikorwa. 

Amazi y’Ikiyaga cya Kivu, ni kimwe mu bikurura ba mukerarugendo Mu karere ka Rubavu. 

Gusa, kuri ubu abafite hoteli na resitora muri Mujyi wa Rubavu,  bavuga ko  bamwe mu bari baragendereye aka gace bahisemo kuhava mu gihe cy'imitingito, ibintu byabateye ibihombo. 

Nyuma y'icyumweru iyi mitingito igabanutse aba abakora mu rwego rw'ubukerarugendo baravuga ko  ubu batangiye ibikorwa byabo nk'ibisanzwe, ndetse bagasaba abantu kuhatemberera nk'ibisanzwe. 

Ni ibintu kandi abatemberera muri aka gace nabo bemeza, aba ni abahatembereye muri iyi minsi. 

Mabete Dieudone umuyobozi wungirije w’ishyirahamwe ry’ abanyamahoteli muri aka karere kazwiho kuba agace k'ubukerarugendo avuga ko ubu bashyize hamwe imbaraga ngo bafatanye mu guhangana n’ingaruka z'ibiza, ariko na we agasaba abasubitse gahunda yo gusura Rubavu kuzisubukura kuko ubu hagendwa. 

Akarere ka Rubavu by’umwihariko umujyi wa Gisenyi  wibasiwe n' imitingito yatewe n' iruka ry' ikirunga cya Nyiragongo gasanzwe karimo ibikorwa byinshi by' ubukerarugendo ndetse kanagendwa cyane n’ abantu baturutse hirya no hino haba mu Rwanda no mu mahanga. 

Fiston Felix Habineza