Ubugenzacyaha mu iperereza ku byaha abasirikare 5 bakekwaho gukorera i Nyarutarama

Ubugenzacyaha bwa gisirikare bwatangiye iperereza ry'ibanze ku byaha by'ihohoterwa abasirikare 5 bo ngabo z'u Rwanda bakekwaho kuba barakoreye abaturage bo mu midugudu wa Kangondo ya 2 na Kibiraro ya mbere, yo mu Murenge wa Remera mu Karere ka Gasabo. 

Ibyaha abo basirikare bakekwaho birimo gukubita no gukomeretsa,kwambura bamwe mu baturage n'ibindi. Ni ibyaha byabaye mu bihe bitandukanye guhera ku itariki ya 12 werurwe 2020 kugeza 30 z'uko kwezi.

Muri iri perereza buri muturage uvuga ko yahohotewe arakirwa n'umugenzacyaha wa gisirikare akabazwa hubahirijwe amabwiriza y'ubwirinzi asaba gusiga intera ihagije hagati y'ubazwa n'ubaza.

Abaturage batuye muri iyo midugudu bishimiye uburyo ubutabera bwa gisirikare bwahise butangira iperereza kuri ibyo byaha kandi ababikekwaho bagatabwa muri yombi na bamwe mu bambuwe agahita bashumbushwa bimwe mu bikoresho byabo.