UBUZIMA BWO MU MUTWE: Inzego z'ubuzima zirashishikariza abantu kurushaho kwegera abagizweho ingaruka na COVID-19

Kuri iyi tariki ya 10 Ukwakira, ni umunsi mpuzamahanga wahariwe ubuzima bwo mu mutwe, umunsi washyizweho  n'umuryango w'abibumbye hagamijwe kureba ibyagezweho mu kwita ku buzima bwo mu mutwe no gukemura ibibazo bikiri muri urwo rwego.

Inzego zishinzwe ibijyanye n'ubuzima bwo mu mutwe zavuze ko muri ibi bihe bya Covid 19, abantu bakwiye kurushaho kuba hafi y'abafite intege nke cyangwa abagizweho ingaruka zikomeye n'iki cyorezo kugira ngo zidahungabanya  ubuzima bwabo bwo mu mutwe.

Ubushakashatsi bwakozwe n'ikigo cy'igihugu gishinzwe ubuzima RBC mu mwaka wa 2018 bwagaragaje ko mu Rwanda umuntu 1% afite ikibazo cy'uburwayi bwo mu mutwe buzwi nka SCHZOPHRENIE, 3% bafite uburwayi bw'igicuri naho 12% bafite hagati y'imyaka 14 na 65 bafite ikibazo cya depression cg indwara y'agahinda, iki kibazo mu barokotse jenoside kiri kuri 35%.

Umuryango w'abibumbye uvuga ko ku isi abantu hafi miliyari 1 bafite ibibazo binyuranye birebana n'ubuzima bwo mu mutwe, buri mwaka abagera kuri miliyoni 3 bapfa bazize gukoresha nabi ibinyobwa birimo alchool, mu gihe buri masegonda 40 umuntu umwe apfa azize kwiyahura.