U Rwanda rurakataje mu ikoranabuhanga mu guhangana na COVID19

Ikigo gishinzwe Ubuzima mu Rwanda (RBC) kivuga ko gukoresha ikoranabuhanga mu bikorwa binyuranye bifitanye isano no kurwanya icyorezo cya covid 19 bifasha igihugu gufata imyanzuro ikwiye kuko amakuru aboneka vuba, bityo n'ibikorwa bishobora gukwirakwiza iki cyorezo bikagabanuka ku buryo bugaragara.

Mu cyumba gihurizwamo amakuru yose afitanye isano n'ubuzima, Muhamed Semakula umukozi wa RBC ukuriye ishami risesengura  aya makuru  arasobanura by'umwihariko ay'ingenzi arebana n'icyorezo cya covid 19 agera muri RBC avuye mu nzego zitandukanye mu gihugu.

Amwe mu makuru y'icyorezo cya Covid 19 ni ajyanye n'umubare w'abandura, imyaka yabo, abagabo n'abagore, umubare w'abahitanwa n'iki cyorezo muri buri karere, akarere gafite imibare myinshi y'abanduye, abakize cyangwa abapfuye, abapimwe, abakingiwe, n'ibindi.

Kuva icyorezo cya covid 19 cyagera mu Rwanda mu kwezi kwa gatatu 2020, ikoranabuhanga ryifashishwa n'inzego z'ubuzima mu gupima, gukurikirana, kwita ku barwayi b'iki cyorezo no gukuzanya no kubika amakuru y'ingenzi arebana na cyo kandi mu gihe cya vuba.

Umuyobozi w'Ishami rishinzwe kurwanya no gukumira indwara z'ibyorezo Dr Albert Tuyishime ashimangira ko ibi bituma igihugu gifata ingamba zishingiye ku makuru aba yakusanijwe.

Mu gukomeza kurwanya icyorezo cya Covid 19, hashyizweho gahunda yo gutanga serivisi zinyuranye hifashishijwe ikoranabuhanga hagamijwe ko abantu badahura kenshi. Serivisi nyinshi zirebana no gusaba ibyangombwa binyuranye zashyizwe ku rubuga Irembo rufatwa nk'urworoheje ibintu ku buryo bugaragara nkuko bivugwa n'abatanga izi serivisi.

Kugura no kugurisha byinshi mu bicuruzwa na serivisi na byo byimuriwe mu ikoranabuhanga aho abenshi mu bacuruzi batagihura n'ababaguzi haba mu guhererekanya ibicuruzwa cyangwa kwishyurana, n'aho bibaye ntihagire ukora ku mafaranga; iyi ni intambwe abantu basanga yaravanyeho byinshi mu bikwirakwiza icyorezo cya Covid 19.

RBC ivuga ko hakurikijwe imbaraga zashyizwe mu ikoranabuhanga mu nzego zitandukanye z'ubuzima bw'igihugu, ngo nubwo icyorezo cya Covid19 cyatsindwa burundu bitazabuza ko iri koranabuhanga rizakomeza gukoreshwa no mu bindi.

Usibye kwifashisha ikoranabuhanga mu gupima abinjira mu gihugu ndetse n'abagisanzwemo, u Rwanda rurategura mu minsi iri imbere umushinga wo kuzifashisha imbwa mu bikorwa byo gupima icyorezo cya Covid 19 aho ibipimo zizajya zifata bizagereranwa n'ibifatwa mu buryo busanzwe.

Jean Claude MUTUYEYEZU