AMAFOTO: U Rwanda na RDC biyemeje gukuraho inkomyi mu by’ubucuruzi

Kuri uyu wa Gatandatu, u Rwanda na Repubulika Iharanira Demukarasi ya Kongo byiyemeje gukuraho inkomyi mu bucuruzi bwambukiranya imipaka, ibi bikaba bikubiye mu masezerano yasinywe n'abahagarariye ibihugu byombi, ubwo Perezida Paul Kagame yasozaga uruzinduko rw'umunsi umwe i Goma mu Ntara y'Amajyaruguru y'iki gihugu.

Akigera ku mupaka w'ibihugu byombi, Perezida Paul Kagame yakiriwe na mugenzi we wa RDC Felix Tshisekedi, abakuru b'ibihugu byombi bahise bajya gusura ibice byagizweho ingaruka n'iruka ry'ikirunga cya Nyiragongo.

Nyuma hakurikiyeho ibiganiro byo gutsura umubano w'ibihugu byombi, ibiganiro byasojwe no gusinya amasezerano ku ishoramari, gukuraho gusoresha kabiri ndetse n'amasezerano ku bucukuzi bw'amabuye y'agaciro.

Mu kiganiro n'abanyamakuru, Perezida wa Repubulika Iharanira Demukarasi ya Kongo yashimangiye ko imbogamizi ku bucuruzi bwambukiranya imipaka, zigomba kuvaho mu nyingu z'abaturage.

Ku bijyanye n'ubucuruzi, Perezida Kagame yashimangiye ko atari byiza ko umuntu abonamo mugenzi we ikibazo, ahubwo ko akwiye ku mubonamo amahirwe.

Umukuru w'igihugu yavuze ko kuvanaho inkomyi mu bucuruzi ari umukoro w'inzego zitandukanye.

Abakuru b'ibihugu byombi bashimangiye ko ibihugu byombi birenga ibihe bibi byanyuzemo kubera umutekano muke, bikarangwa n'ibikorwa by'iterambere byubakiye ku mibanire myiza.

Jean Pierre Kagabo