RUBAVU: UMWARIMU UFITE UBUMUGA BWO KUTABONA NIWE UTSINDISHA CYANE

Abanyeshuri  n'ubuyobozi b’urwunge rw'amashuri Amahoro Anglican  ruri mu Murenge wa Gisenyi mu Karere ka Rubavu  bavuga  ko bishimira umusaruro w'umurimo utangwa n'umwarimu ufite ubumuga bwo kutabona UWIMANA Jean Marie Vianney, kuko isomo yigisha ari ryo abanyeshuri  batsinda cyane.  

Uyu mwarimu witwa UWIMANA Jean Marie Vianney w’imyaka 44 ufite ubumuga bwo kutabona, afite impamyabushobozi y'icyiciro cya kabiri cya kaminuza mu Kinyarwanda n'uburezi, akaba yigisha amasomo y'indimi mu rwunge rw’amashuri y'uburezi bw’ibanze bw’imyaka cumi n'ibiri  cya Amahoro Anglican.

Uyu mugabo avuga ko amaze imyaka itanu akora umurimo wo kwigisha, agashimira leta yagaragaje ko abafite ubumuga nabo bashoboye, ngo kuko uyu murimo wamukuye mu bwigunge none ubu ari guteza imbere umuryango we n’igihugu muri rusange.

Abanyeshuri yigisha biga indimi n'ubuvanganzo bavuga ko mu masomo yose biga, batsinda ku rwego rushimishije amasomo  abigisha bitewe n'uburyo ngo abaha  umwanya uhagije wo kwishakira ibisubizo.

Ibi byatumye mu myaka itatu ishize, UWIMANA Jean Marie Vianney ashimirwa buri mwaka kuba umurezi w'indashyikirwa kurusha abandi kuri iryo shuri, bitewe nuko amasomo yigisha ari yo abanyeshuri batsindaga cyane mu bizamini bya Leta nk’uko bivugwa n'umuyobozi w'urwunge rw’amashuri Amahoro Anglican NZAMWITAKUZE Valerie.

Inkuru ya Fredy RUTERANA