AGEZWEHO

  • Minisiteri y'Ibidukikije yahagurukiye ikibazo cy’imiswa yangiza imyaka n’ibiti mu Ntara y'Iburasirazuba – Soma inkuru...
  • MINALOC yasabye abayobozi b'inzego z'ibanze baherutse gutorwa kwirinda kwegura no kweguzwa – Soma inkuru...

RTDA yemereye PAC ko igiye gukemura ibibazo by’ingurane ku mitungo y’abaturage yangizwa

Yanditswe Sep, 08 2022 19:40 PM | 283,720 Views



Ubuyobozi bw’Ikigo gishinzwe iterambere ry’ubwikorezi RTDA bwemereye komisiyo ishinzwe gukurikirana imikoreshereze y’umutungo n’imari bya Leta, ko igiye gukemura ibibazo by’ingurane ku mitungo y’abaturage yangizwa ku bw’inyungu rusange ndetse n’iby’imihanda yangirika imaze igihe gito ikozwe.

Hirya no hino mu gihugu hagaragara abaturage bangirijwe imitungo yabo ku bw’ibikorwa by’inyungu rusange nk’imihanda, bagategereza kwishyurwa amaso agahera mu kirere.

Ubwo abadepite bagize komisiyo ishinzwe gukurikirana imikoreshereze y’imari n’umutungo by’igihugu, babazaga ubuyobozi bw’ikigo gishinzwe iterambere ry’ubwikorezi mu Rwanda, RTDA, bagaragaje ko raporo y’umugenzuzi mukuru w’imari ya Leta igaragaza ibibazo by’ingurane ikwiye itinda guhabwa abangirijwe imitungo kubera ibikorwa by’inyungu rusange. 

Bavuga ko ibi binyuranyije n’amategeko bikanahombya Leta kuko iba igomba kurenzaho 5% y’ubukererwe.

Ikindi ni imihanda yubakwa igahita isaza hadaciye kabiri.

Umuyobozi mukuru wa RTDA, Imena Munyampenda yavuze ko kuri ubu hari miliyari 15 Frw z’ibirarane by’ingurane bitegura kwishyura abaturage.

Umunyamabanga uhoraho muri minisiteri y’ibikorwaremezo, Abimana Fidele yavuze ko iki kibazo cy’ingurane cyaganiriweho na minisiteri n’izindi nzego kuburyo itegeko rigomba kubahirizwa.

Yagize ati “Niba umuturage afite umurima w’ibijumba umuhanda wakagombye kuza yabonye ingurane kugira ngo akomeze ashake aho yongera guhinga, tutabigiye mu mizi twebwe nka minisiteri tugomba kwicara na RTDA tukaganira ku kintu cy’ingurane mbere y’uko dutangiza kubaka umuhanda nk’uko mwabibonye nka REG iyo bagiye kubaka umuyoboro w’amashanyarazi abaturage baba bamaze kwishyurwa,ikindi cyakorwa ni uko twaganira na minisiteri y’imari n’igenamigambi kugira ngo twishyure ibirarane byose dufate ingamba zindi.”

Muri raporo y’umugenzuzi mukuru w’imari ya leta ya 2020-2021, hagaragaramo ko leta yatanze amafaranga miliyari 28 Frw yo gusana imihanda no kuyubaka ariko ikangirika itamaze kabiri kubera inkangu, indi igapfa ubusa.iyi minisiteri yagaragaje ko hafashwe ingamba zo kujya harebwa ko ibikoresho byifashishwa bijyanye n’igihe.

Aba badepite bagize PAC kandi bumvise ibisobanuro by’ikigo gishinzwe guteza imbere ibikorwa by’iterambere mu nzego z’ibanze ku ikoreshwa ry’amafaranga yo muri gahunda yo kurengera abatishoboye izwi nka VUP.

Amwe mu makosa agaragara hari ukunanirwa kwishyuza inguzanyo zahawe abagenerwa bikorwa b’iyi gahunda, gukererwa kwishyura abarimo n’abakora imirimo y’amaboko ndetse n’amafaranga ahabwa abagenerwa bikorwa atagaragara mu bitabo by’ibaruramari.

Aha kandi hiyongeraho n’amafaranga aguma kuri konti z’uturere ntakoreshwe ibyo yagenewe.

Umuyobozi mukuru wa Loda, Nyinawagaga Claudine yasobanuye ko gukererwa guha amafaranga abagenerwa bikorwa ba VUP byaterwaga n’uko Imirenge Sacco itarakoresha ikoranabuhanga ariko ngo bagishakiye inzira yo kugikemura.

Ku bijyanye no kugaruza amafaranga yahawe abagenerwabikorwa b’iyi gahunda ya VUP, ngo hari imbogamizi bahuye nazo zirimo abahawe aya mafaranga bakitaba Imana nta bazungura ndetse n’izindi mpamvu ku buryo amafaranga asaga miliyari 4,6 Frw hafashwe gahunda yo kuyasiba mu bitabo by’ibaruramari.

Iki gikorwa cyo kumva ibisobanuro ku ikoreshwa ry’imari n’umutungo bya Leta, kizarangira humviswe abayobozi b’ibigo n’inzego 85, bikaba biteganijwe ko kizarangira taliki ya 23 Nzeri.

Jean Paul Turatsinze



Ba uwambere gutanga igitekerezo

Tanga igitekerezo:



RSS FEED

Minisiteri y'Ibidukikije yahagurukiye ikibazo cy’imiswa yangiza imyak

MINALOC yasabye abayobozi b'inzego z'ibanze baherutse gutorwa kwirinda

Imibare y'abanyeshuri bava mu mashuri yigenga bakajya mu mashuri ya Leta ik

Nibona nk'umwana wavukiye mu Rwanda kuko nasubiye ku ibere - Uwavuye muri L

U Rwanda na Singapore byiyemeje kurushaho guteza imbere ubutwererane hagati yaby

Amashuri yongeye gufungura imiryango muri Cabo Delgado