AGEZWEHO

  • Minisiteri y'Ibidukikije yahagurukiye ikibazo cy’imiswa yangiza imyaka n’ibiti mu Ntara y'Iburasirazuba – Soma inkuru...
  • MINALOC yasabye abayobozi b'inzego z'ibanze baherutse gutorwa kwirinda kwegura no kweguzwa – Soma inkuru...

RSSB yasabwe kubyaza umusaruro ubutaka bwa miliyari 137 Frw bumaze imyaka 10 budakoreshwa

Yanditswe Sep, 05 2022 17:29 PM | 200,640 Views



Abadepite bagize komisiyo y’Inteko Ishinga Amategeko ishinzwe gukurikira imikoreshereze y’imari n’umutungo by’igihugu, PAC bagiriye inama ikigo cy’ubwiteganyirize mu Rwanda, RSSB gushyira imbaraga mu gushora imari ahunguka, no kubyaza umusaruro umutungo iki kigo gifite harimo n’ubutaka bufite agaciro ka miliyari 137 bumaze imyaka irenga 10 ntacyo bukoreshwa.

Abagize PAC barimo kubariza mu ruhame abayobozi b’inzego n’ibigo bya leta byagaragayeho amakosa arebana n’imicungire y’umutungo w’igihugu, nk’uko byaragaragajwe na raporo y’umugenzuzi mukuru w’imari ya leta y’umwaka wa 2020/2021.

Ikigo cy’ubwiteganyirize mu Rwanda RSSB cyabimburiye ibindi, cyavuzweho gushora imari ingana na miliyari zisaga 416 mu bigo 33, gusa muri ibi bigo, habarwa agaciro k’ishoramari ry’ibigo 5 gusa. 

Habarurwa kandi miliyari 162 zitagaragarijwe umugenzuzi mukuru w’imari ya leta igenagaciro k’imishinga zakoreshejwemo.

Kuri ibi hiyongeraho ikibazo cy’ubutaka bubarirwa agaciro ka miliyari zisaga 137 Frw RSSB yaguze ariko bumaze imyaka isaga 10 ntacyo bukoreshwa.

Raporo y’umugenzuzi mukuru w’imari ya leta kandi igaragaza ko RSSB yubahirije inama z’umugenzuzi mukuru w’imari ya leta ku gipimo cya 31%, ibigaragaza icyuho iki kigo gifite mu micungire y’ayo k’amafaranga iki kigo gifitiye abanyamuryango bacyo.

Umuyobozi mukuru wa RSSB, Rugemanshuro Regis avuga ko nubwo hari amakosa yagaragajwe, iki kigo kigeze kure kiyakosora kuko akenshi ngo biterwa n’ikoranabuhanga ritaranozwa muri iki kigo n’inzego bikorana. 

Naho kuba RSSB igura ubutaka ntibukoreshwe, ngo bituruka ku kuba burushaho guhenda bagahitamo kubugura bakabubika.

Abadepite bagaragaje kutanyurwa n’ibisobanuro bahawe n’itsinda rya RSSB, basaba ko ibibazo binyuranye byagaragajwe iki kigo gikora inyandiko yo kwiyemeza igihe bazaba bamaze kubikemura.

Ibi birimo umushinga wa Batsinda wo kubaka inzu ziciriritse wadindiye ndetse izi nzu ngo zikaba zitakiri mu rwego ruciriritse.

Abadepite basabye RSSB gushyira mu gaciro igihe bagiye gushora imari mu mishinga inyuranye kugira ngo iki kigo kigirire inyungu abanyamuryango bacyo.

RSSB yasabwe kandi gukemura ibibazo birebana no kwishyuza abakoresha badatangira abakozi imisanzu, ndetse nacyo kikishyura abo kibereyemo imyenda, kikanakurikirana amavuriro acyishyuza amafaranga y’ikirenga.

Umugenzuzi Mukuru w’imari ya leta, Alexis Kamuhire avuga ko kuba hari ibigo byitaba bwa mbere PAC ngo biba bigaragaza uburangare butangiye kubaho mu micungire

Ku munsi wa mbere wo kumva inzego za leta zakoresheje nabi umutungo wayo, hanakiriwe ikigo gishinzwe mine, petrole na Gaz cyitabye bwa mbere PAC ku mpamvu zo gukererwa kwishyura imisoro ya Rwanda Revenue bikabaviramo gucibwa amande.

Iki kigo kandi cyahawe ubutaka na ministeri y’ingabo bwo kubakaho laboratoire isuzuma amabuye y’agaciro, ariko hakaba harabaye kugenda biguru ntege mu kwiyandikishaho ubu butaka, aho n’imashini yaguzwe miliyoni zisaga 400 ngo izakoreshwe muri iyo laboratoire basanze idakora.

Hanakiriwe kandi ikigo cy’igihugu gishinzwe imikurire y’abana bato kugirango nacyo gisobanure imikorere mibi mu gucunga imari ya leta  kivugwaho.




Ba uwambere gutanga igitekerezo

Tanga igitekerezo:



RSS FEED

Minisiteri y'Ibidukikije yahagurukiye ikibazo cy’imiswa yangiza imyak

MINALOC yasabye abayobozi b'inzego z'ibanze baherutse gutorwa kwirinda

Imibare y'abanyeshuri bava mu mashuri yigenga bakajya mu mashuri ya Leta ik

Nibona nk'umwana wavukiye mu Rwanda kuko nasubiye ku ibere - Uwavuye muri L

U Rwanda na Singapore byiyemeje kurushaho guteza imbere ubutwererane hagati yaby

Amashuri yongeye gufungura imiryango muri Cabo Delgado