RGB yashyize hanze ibipimo by’imiyoborere

Ku nshuro ya 8, Urwego rw'Igihugu rw’Imiyoborere, RGB rwatangaje ibipimo by’imiyoborere “Rwanda Governance Score Card, inkingi 6 ku 8 ziri ku gipimo  cy’amanota arenga 80%.

Muri ibi bipimo, inkingi y’umutekano iri ku isonga n’amanota 95.47%, inkingi y’ireme ry’imitangire ya serivisi yazamutseho 3.5%, ubu ikaba iri kuri 80%.

Inkingi yasubiye inyuma kurusha izindi, ni iy’Imiyoborere mu bukungu n’ubucuruzi, yavuye kuri 78.14% yariho mu bushakashatsi buheruka, igera kuri  74.65%.

Iryo subira inyuma rya 3.49% ryatumye iyi nkingi iza inyuma y’izindi. Kumanuka kw’iyi nkingi ngo bifitanye isano n’ihungabana ry’ubukungu ryabaye mu mwaka wa 2020 bitewe n’ingaruka z’icyorezo cya COVID-19 aho ubukungu bwasubiye inyuma kugera kuri -3,4%.

Ibipimo 23 muri 35 biri ku kigero cya 80% kuzamura, naho ibipimo 12 biri hagati ya 60% na 79,9% bikaba ari nako byari bimeze muri RGS ya 7.

Umuyobozi wungirije wa RGB, Dr Emmanuel Niyibishaka, yavuze ko “Ubushakashatsi  bukorwa hagamijwe kwisuzuma bigendanye n’intego u Rwanda rwihaye mu bijyanye n’imiyoborere myiza.”

Iri suzuma rigaragaza kandi ko ibipimo 5 kuri 35 byazamutse ku kigereranyo kiri hejuru ya 5%.  Igipimo kirebana no gukorera mu mucyo nicyo kiza imbere mu byazamutse cyane kuko cyazamutseho 7,14%.