RCS yasezereye mu cyubahiro abakozi b'uru rwego 86 bagiye mu kiruhuko cy'izabukuru

Urwego rw'Igihugu rushinzwe Imfungwa n'Abagororwa, RCS rwasezereye mu cyubahiro abakozi b'uru rwego 86 bagiye mu kiruhuko cy'izabukuru, Minisiteri y'umutekano mu gihugu ikaba isaba abasezerewe kuzakorana neza n'izindi nzego basanze.

Rtd CP Peter Kagarama wavuze mu izina ry'abasezerewe, yashimye imikorere n'imikoranire yaranze abakozi ba RCS bagiye mu kiruhuko cy'izabukuru, anashima umusanzu batanze mu kubaka uru rwego rw'igihugu rushinzwe imfungwa n'abagororwa.

By'umwihariko yashimye uruhare rwa Perezida wa Repubulika, mu kubaka urwego rushinzwe imfungwa n'abagororwa.

Minisitiri w'umutekano mu gihugu, Gasana Alfred avuga ko ashima aba bakozi b'urwego rw'igihugu rushinzwe imfungwa n'abagororwa umusanzu batanze mu iterambere ry'urwego, maze abasaba kuba ba ambasaderi aho bagiye anabasaba kuzakorana n'izindi nzego bazasanga.

Aba basezerewe barimo aba ofisiye bakuru 11, aba commisioner's of prisons 3 n'abacungagereza bato 72.

Inama y'abaminisitiri yateranye ku wa 29 Nyakanga 2022 niyo yemeje ko aba bakozi b'urwego rw'igihugu rushinzwe imfungwa n'abagororwa bashyirwa mu kiruhuko cy'izabukuru.