Polisi yagaragaje abagabo bane bakekwaho kwiba moto bakazihindurira ibyapa

Polisi y’ u Rwanda yagaragaje abagabo bane, bakekwaho icyaha cyo kwiba moto bakazijyana mu igaraje rikorera mu karereka Muhanga ry’umugabo witwa Mudahemuka Francois, bakazihindurira ibyapa biziranga hamwe n’ibyuma byazo bakongera bakazigurisha.

Aba bagabo bavuga ko akenshi baziba bakoresheje imfunguzo z’incurano, bagacunga aho umuntu yayiparitse bagahita bayatsa bitabagoye bakayitwara bakajya kuyihindura

Aba bagabo bavuga ko bafashwe bari bamaze kwiba moto zirindwi, aho inyinshi bazikuye mu Mujyi wa Kigali bazibye aba motari, bakazijyana i Muhanga kuzihindura.

Uretse ny’ir’iryo garaje wabakingiraga ikibaba, harimo n’umukanishi wazihinduraga, uwazibaga n’uwazanaga ibyuma byo gusimbura ibyari bisanzwemo.

Umuvugizi wa Polisi y’ u Rwanda, CP John Bosco Kabera avuga ko abajura bakomeje guhindura amayeri, gusa ariko akanavuga ko ntacyo bazakora ngo kireke kumenyekana.

Mu gihe iki cyaha cyabahama, bashobora guhanishwa igifungo cy’imyaka 2 ndetse n’ihazabu ya miliyoni byiri mu mafaranga y’u Rwanda.