Kayondo ukekwaho uruhare muri Jenoside yatawe muri yombi n’u Bufaransa

Pierre Kayondo wabaye Perefe wa Kibuye yatawe muri yombi n’ubutabera bw’u Bufaransa, kubera uruhare akekwaho muri Jenoside yakorewe Abatutsi mu cyahoze ari Gitarama.

Umunyamategeko uba mu Bufaransa, Me Richard Gisagara yatangaje ko kuba Kayondo yatawe muri yombi ari igikorwa gishimishije, kigaragaza ko n'abandi bakomeje kwihisha muri iki gihugu igihe kizagera nabo batabwe muri yombi.

Avuga ko uyu mugabo ari Umunyarwanda wari warahungiye mu Bufaransa mu Mujyi wa Le Havre, ikirego kikaba cyaratanzwe mu myaka ibiri ishize akekwaho kugira uruhare muri Jenoside yakorewe Abatutsi muri Gitarama ari naho leta y'abatabazi yari yarahungiye.

Pierre Kayondo yabaye Perefe wa Kibuye ndetse n’umwe mu bagize Inteko Ishinga Amategeko y’u Rwanda.

Me Gisagara avuga ko uyu mugabo ari mu kigero cy'imyaka 70.