Perezida wa sena ya Kenya ari mu ruzinduko mu Rwanda

Perezida wa sena ya Kenya, Lusaka KENNETH ari mu ruzinduko rw'iminsi 5 mu Rwanda. Mu gitondo cyo kuri uyu wa kane, aherekejwe na mugenzi we w'u Rwanda,  Bernard MAKUZA, Rt. Hon. Ken Lusaka yasuye urwibutso rwa Jenoside yakorewe Abatutsi rwa Kigali, aho yasobanuriwe amateka ya Jenoside yakorewe abatutsi.

Nyuma yaho, yasuye ingoro ndangamateka y'urugamba rwo guhagarika Jenoside iri mu Nteko Ishinga Amategeko.

Rt. Hon. Ken Lusaka yavuze ko biteye agahinda uburyo abantu bazize ubwoko bwabo akemeza ko kugira ngo umuntu asobanukirwe neza amateka ya Jenoside yakorewe Abatutsi agomba gusura urwibutso.

Avuga ko nk'umuyobozi, agomba guharanira ko nta handi ku Isi Jenoside ikwiye kongera kuba, bakarwanya ikiyiganishaho cyose.

Avuga kandi ko abagize uruhare muri Jenoside yakorewe Abatutsi bakwiye gushakishwa aho bari hose ku Isi bagahanwa.