Abayoboke ba PDI basabwe kunyomoza abagoreka amateka y'u Rwanda

Ishyaka ntangarugero  muri demokarasi, PDI ryasabye abayoboke baryo kujya banyomoza abakomeje gusebya poliltike nziza igihugu gifite, bakanagoreka amateka y'u Rwanda.

Ibi byagarutsweho kuri iki Cyumweru, ubwo iri shyaka ryatangaga  amahugurwa ku rubyiruko ruhagarariye urundi,  barebera hamwe ingamba zo guteza imbere igihugu binyuze muri gahunda ya Ndi Umunyarwanda.

Perezida w'iri shyaka, Sheikh Mussa Fazil Harerimana yagaragaje ko iterambere ry'igihugu ritagerwaho buri munyarwanda atabanje gushyira imbere ubumwe bw'abanyarwanda, kandi hakirindwa ivangura rishingiye ku moko buri munyarwanda akishyira akizana mu nyungu z'igihugu.

Yavuze ko ibi kugira ngo bigerweho neza, ari uko abayoboke b'iri shyaka bagomba gushishoza bakareba niba  ibyo bigishwa mu madini n'amatorero  bijyanye n'icyerekezo cy'igihugu.

Yagize ati “Urukingo rwa gahunda ya Ndi Umunyarwanda ruzabafasha gusobanura neza no kunyomoza abagoreka amateka y'u Rwanda, bakanasebya politiki nziza z'igihugu.”

“Kugendana na gahunda za leta zigamije guteza imbere abanyarwanda, kwimakaza umuco nyarwanda n'amateka by'igihugu no kureba niba ibivugwa bifite ishingiro cyangwa ari ukuri, nibyo mukwiye gukora.”

Yababwiye ko izo nkingi arizo zizafasha abayoboke b'iri shyaka kuzagera ku cyerekezo cy'igihugu, no gushyigikira politiki nziza y'igihugu ndetse no kwimakaza ubumwe n'ubwiyunge binyuze muri gahunda ya Ndi Umunyarwanda.