Perezida N’Guesso yashimye umubano ukomeje kuranga u Rwanda na Congo Brazzaville

Ambasaderi Mutsindashyaka Théoneste yashyikirije Perezida wa Congo Brazzaville, Denis Sassou N’Guesso impapuro zimwemerera guhagararira u Rwanda muri icyo gihugu, uyu mukuru w’Igihugu ashima imibanire iri hagati y’ibihugu byombi.

Perezida Denis Sassou N’Guesso yashimye umubano n’ubushuti u Rwanda na Congo Brazzaville bifitanye, n'uburyo perezida Paul Kagame akomeje guteza u Rwanda imbere, n'umurava we mu guharanira icyateza imbere umuryango wa Afurika Yunze Ubumwe muri rusange.

Yashimangiye ko igihugu cye kiteguye gufatanya n’u Rwanda mu kuzamura imikoranire igamije iterambere ry'ubukungu bw’ibihugu byombi.

Ambasaderi Mutsindashyaka nyuma yo gutanga ubutumwa yahawe na Perezida w'u Rwanda Paul Kagame, yatangaje ko yishimiye guhagararira u Rwanda muri Congo Brazza Ville isanzwe ifitanye umubano mwiza n’u Rwanda, anizeza Perezida Sassou N’Guesso ko azakomeza gushimangira  ubufatanye ndetse n'umubano mwiza biri hagati y'ibihugu byombi.

Yavuze kandi ko azaharanira kuzamura ubuhinzi, ubworozi ndetse n’inganda zitunganya ibibikomokaho.

Yavuze ko ibi bizashyirwamo ingufu hifashishijwe amasezerano y’umubano n’ubufatanye (Jumelage) hagati y’inzego z’ubuyobozi zibishinzwe, kugira ngo bigirire akamaro abaturage b’u Rwanda na ba Congo.

Ikindi ngo ni ugushyira imbaraga mu bijyanye n’ubuhahirane bushingiye ku bukerarugendo.