Perezida Kagame yitabiriye umuhango wo Kwita Izina abana b'ingagi 25

Perezida wa Repubulika Paul Kagame, yifatanyije n'ibihumbi by’Abanyarwanda ndetse n’abanyamahanga baturutse mu bice bitandukanye by’Isi mu muhango wo Kwita Izina abana 25 b’ingagi wabereye mu Kinigi mu Karere ka Musanze kuri uyu wa Gatanu.

Uyu muhango wabaga ku nshuro ya 15 witabiriwe n’ibyamamare byise amazina aganisha ku mbaraga za Leta y’u Rwanda mu kubungabunga urusobe rw’ibinyabuzima by’umwihariko ingagi zo mu misozi.

Abana bahawe amazina ni abavutse hagati ya tariki ya 1 Nyakanga 2018 n’iya 11 Gicurasi 2019.

Mu butumwa yatanze Perezida wa Repubulika Paul Kagame, yashimiye abaturage ko bifata neza, bakanafata neza ibidukikije, abasaba gukomeza ubufatanye mu kubibungabunga.

Perezida Kagame yagaragaje ko intambwe nziza yatewe mu kwita ku bidukikije by'umwihariko ingagi zo mu birunga itashoboraga kubaho hatabayeho ubufatanye bw’abaturage no gukurikirana neza ko abo baturage babona inyungu muri ubwo bufatanye bumaze imyaka,  bwagiriye akamaro igihugu, ingagi na ba mukerarugendo banyuzwe no kuba hano, kandi ko banyuzwe n’umutekano kubera ubwo bufatanye.

Kuri iyi nshuro uyu muhango witabiriwe n’ibyamamare birimo Umwongereza Naomi Campbell, Umunyamerika w’icyamamare mu muziki wa RnB Ne-Yo, umunyabigwi muri ruhago Tony Adams wakiniye Arsenal yo mu Bwongereza n’abandi.