Perezida Kagame yijeje urubyiruko rwo muri Commonwealth ubufatanye mu gushaka umuti w’ibibazo

Mu gihe u Rwanda rugiye kuyobora umuryango uhuza ibihugu bihuriye ku rurimi rw’icyongereza Commonwealth, Perezida Paul Kagame arizeza urubyiruko rwo muri uyu muryango ubufatanye mu gushakira umuti ibibazo n’imbogamizi bikibangamiye iterambere n’imibereho myiza y’urubyiruko ruwurimo.

Umukuru w’igihugu ibi yabitangarije mu nama yahuje abahagarariye urubyiruko rwo muri uyu muryango, ndetse na bamwe mu bakuru b’ibihugu n’aba za guverinoma bari i Kigali mu nama ya CHOGM.

Iyi nama izwi nka Intergenerational dialogue yabaye mu gitondo cyo kuri uyu wa Gatandatu, ikaba ibaye ku nshuro ya 7.

Perezida Kagame yagaragaje ko ubufatanye ari ingenzi mu gushakira umuti ibibazo urubyiruko rwagaragaje, ashimangira ko hafi ya byose bihuriweho n’abato n’abakuru.