Perezida Kagame yazamuye mu ntera abofisiye barenga 900

Kuri uyu wa Gatatu Perezida wa Repubulika Paul Kagame akaba n’Umugaba w’Ikirenga w’Ingabo z’u Rwanda, yazamuye mu ntera abasirikare  987, abandi bashyirwa mu myanya itandukanye yiganjemo iy’abashinzwe ibikorwa bya gisirikare muri za Ambasade z’u Rwanda mu mahanga.

Mu itangazo ryashyizwe hanze n’Ubuyobozi bw’Ingabo z'u Rwanda, Brig Gen Joseph Demali, yagizwe uhagarariye ibikorwa bya  gisirikare muri Ambasade y’u Rwanda muri Turukiya.

Brig Gen Joseph Demali  yigeze kuba Umugaba Mukuru w’Ingabo z’u  Rwanda zirwanira mu kirere.

Lieutenant Colonel Stanislas Gashugi yazamuwe mu ntera agirwa Colonel, anashingwa guhagararira ibikorwa bya gisirikare muri Ambasade y’u Rwanda muri Tanzania.

Major Ephrem Ngoga yagizwe Lieutenant Colonel, anashingwa guhagararira ibikorwa bya gisirikare muri Ambasade y’u Rwanda muri Kenya,  na ho Major Eustache Rutabuzwa yashinzwe ibikorwa bya gisirikare muri Ambasade y’u Rwanda muri Canada.

Perezida Kagame kandi yazamuye mu ntera Aba-Ofisiye 665, bavanwa ku ipeti rya Lieutenant bagirwa Captain, abandi 319 bari ku ipeti rya Second Lieutenant bazamuwe mu ntera bagirwa Lieutenant.