VIDEWO: Perezida Kagame yashyizeho abasenateri bashya 4

Ashingiye ku biteganywa n'Itegeko Nshinga rya Repubulika y'u Rwanda ryo mu 2003 ryavuguruwe mu 2015, cyane cyane mu ngingo yaryo ya 80; Nyakubahwa Perezida wa Repubulika yashyizeho Abasenateri bakurikira: 

 Dr Dusingizemungu Jean Pierre 

 Kanziza Epiphanie 

 Twahirwa Andre 

 Uwizeyimana Evode 

Aba basenateri baje basimbura abasenateri 4 basoje manda yabo bivuze ko manda ya 3 nisoza na bo bazarenzaho umwaka nk'uko biteganywa n'itegeko Nshinga rya Repubulika y'u Rwanda ryo muri 2003 ryavuguruwe muri 2015.

Dr Dusingizemungu Jean Pierre yari asanzwe ari umwarimu wa Kaminuza. Yayoboye Kaminuza zinyuranye.

Yari kandi Perezida w’Umuryango w’Abacitse ku icumu rya Jenoside yakorewe Abatutsi IBUKA

Twahirwa André ni umuhanga mu ndimi, akaba ari umwanditsi w’umuhanga, wakunze lkwandika ibitabo binyuranye birimo ibivuga ku mateka y’u Rwanda n’uruhare rw’amahanga muri Jenoside yakorewe Abatutsi.

Kanziza Epiphanie yavutse 1972 mu murenge wa Gatunda akarere ka Nyagatare.  Amashuri abanza yayize kuri groupe scolaire Mutumba Nyagatare,  ayisumbuye ayiga Notre Dame du Bon Conseil Byumba  muri normal technique, akomereza muri Kaminuza Yigenga ya Kigali mu ishami rya Relation Internationale (Imibanire y’Ibihugu).

Yari asanzwe ayobora Umuryango WOPU uharanira imibereho myiza y’abagore bo cyiciro cy’abo amateka agaragaza ko basigaye inyuma.

Evode Uwizeyimana ni umunyamategeko wize muri kaminuza zinyuranye. Yabaye umucamanza mu Rwanda.

Yabaye Visi Perezida wa Komisiyo ishinzwe kuvugurura amategeko,

Yabaye Umunyamabanga wa Leta muri Minisiteri y’Ubutabera, ushinzwe Itegeko Nshinga n’andi mategeko.