Perezida Kagame yakiriye Minisitiri w’Ububanyi n’Amahanga w’u Bugereki

Kuri uyu wa Gatanu, Perezida Paul Kagame yakiriye muri Village Urugwiro Minisitiri w’Ububanyi n’Amahanga w’u Bugereki Nikos Dendias watangiye uruzinduko mu Rwanda n'itsinda ayoboye.

Ibiganiro byabo byibanze mu kurushaho kunoza ubufatanye hagati y’ibihugu byombi, ibibazo by’Akarere no hagati ya Afurika n'Umuryango w'Ubumwe bw'Uburayi.

Uyu muyobozi akigera mu Rwanda yasuye urwibutso rwa Jenoside rwa Kigali ruri ku gisozi yunamira inzirakarengane zihashyinguye.

Nyuma we na Minisitiri w'Ububanyi n'Amahanga w'u Rwanda, Dr Vincent Biruta bagiranye ibiganiro, hanashyirwa umukono ku masezerano y’ubufatanye n’imikoranire hagati y'ibihugu byombi. 

Minisitiri Biruta yavuze ko aya masezerano yibanze cyane ku mikoranire mu bya politike, harimo kongerera ubumenyi abakora mu nzego zifitanye isano na dipolomasi y’ u Rwanda na za ambasade yarwo hirya no hino ku Isi. 

Abazanye na Minisitiri w’Ububugeriki bagaragarijwe amahirwe y’ishoramari ari mu Rwanda, bavuga ko biteguye gukorana n’ u Rwanda mu ishoramari cyane cyane mu iterambere ry’ubukerarugendo n’ubucuruzi bwambukiranya imipaka n'ibindi.