Perezida Kagame arakira mugenzi we Félix Antoine Tshisekedi

Kuri uyu wa Gatanu, Perezida Paul Kagame arakira mugenzi we Félix Antoine Tshisekedi wa Repubulika Iharanira Congo mu ruzinduko agirira mu Rwanda.

Abakuru b’ibihugu byombi barahurira mu karere ka Rubavu, bikaba biteganyijwe ko basura bimwe mu bikorwaremezo byagizweho ingaruka n'iruka rya Nyiragongo.

Biteganyijwe ko kuri uyu wa Gatandatu, Perezida Kagame na we azasura Repubulika Iharanira Demukarasi ya Congo.

Intumwa z’ibihugu byombi zizashyira umukono ku masezerano, mu rwego rwo kurushaho gushimangira umubano w’u Rwanda na RDC.

Uruzinduko rwa Perezida Kagame muri DRC ruzasozwa n’ikiganiro n’abanyamakuru.

Tariki 22 Gicurasi uyu mwaka, abantu babarirwa mu bihumbi bo muri Repubulika ya Demokarasi ya Congo bahunze bava mu Mujyi wa Goma uri mu Burasirazuba bw'igihugu nyuma yuko ikirunga kirutse, abenshi bahunze berekeza mu Rwanda.

Aba baturage bakigera mu Rwanda bahawe ubufasha burimo guhabwa ibiribwa no gucumbikirwa, nyuma abashatse gusubira mu gihugu cyabo u Rwanda rubaha imodoka zibacyura.

James Habimana