Perezida Kagame ari Abu Dhabi mu nama mpuzamahanga kuri politiki za Leta

Perezida wa Repubulika Paul Kagame kuri uyu wa Kane yageze Abu Dhabi Bihugu byunze Ubumwe by'Abarabu aho yitabiriye inama mpuzamahanga kuri politiki za Leta. 

Iyi nama izwi nka World Policy Conference izamara iminsi 3 aho itangira kuri uyu wa gatanu tariki ya mbere Ukwakira ikazasoza imirimo yayo tariki eshatu.

World Policy Conference ibaye ku nshuro ya 13 ni inama yo ku rwego rwo hejuru igamije guteza imbere imiyoborere isubiza ibibazo nyakuri byugarije Isi muri iki kinyejana cya 21. Ihuriza hamwe abayobozi bakuru muri politiki n’ubukungu, abashakashatsi n’abanyamakuru.     

Iyi nama yaherukaga kuba muri Mata 2019 ndetse ikaba yarabereye mu mujyi wa Marrakesh muri Maroc initabirwa na Perezida wa Repubulika Paul Kagame.

Umuryango WPC washinzwe mu 2008, niwo utegura iyi nama. Ugamije gutanga umusanzu mu kubaka Isi ifunguye, ifite uburumbuke n’ubutabera kuri bose ntawe uhutajwe hagendewe ku muco we n’indi myemerere iri mu burenganzira bwa buri wese. 

Ferdinand UWIMANA