Perezida Kagame yatangiye uruzinduko rw'iminsi ibiri muri Mozambique

Kuri uyu wa Gatanu Perezida wa Repubulika Paul Kagame yatangiye uruzinduko rw’iminsi ibiri muri Mozambique.

Uru ruzinduko rw'umukuru w'igihugu ruje nyuma y'igihe kigera hafi ku mezi 3 u Rwanda rwohereje ingabo na Polisi kugarura umutekano muri Cabo Delgado by'umwihariko mu duce twari tumaze imyaka 5 twarayohojwe n'ibyihebe ndetse ku munsi wa mbere w'uru ruzinduko Perezida Paul Kagame akaba n'umugaba w'ikirenga w'ingabo z'u Rwanda akaza gusura izo ngabo.

Abasirikare na polisi b'u Rwanda bagera ku 1000 bari muri Mozambique aho barimo gukorana n'igisirikare cy'iki gihugu (FADM) ndetse n'ingabo zoherejwe n'umuryango w'ubukungu w'ibihugu byo muri Afurika y'Amajyepfo SADC.

Ingabo z'u Rwanda zoherejwe muri Cabo Delgado, intara iherereye mu majyaruguru y'Iburasirazuba bwa Mozambique, aho ku bufatanye n'ingabo za Mozambique babashije kubohora imwe mu mijyi n'uduce tw'ingenzi babikuye mu maboko y'umutwe w'iterabwoba, harimo ahitwa Mocimboa de Praia hahoze ari ibirindiro bikuru by'uyu mutwe.

Muri uru ruzinduko kandi 

, Perezida Kagame azagirana ibiganiro byo mu muhezo na perezida wa Mozambique Filipe Nyusi. Ibi biganiro byo mu muhezo bizakurikirwa n'ibindi biganiro bizahuza abahagarariye impande z'ibihugu byombi.

Abaperezida b'ibihugu byombi kandi bazanahagararira isinywa ry'amasezerano y’ubufatanye azasinywa hagati y'impande zombi ndetse banagirane ikiganiro n'itangazamakuru.

Ku munsi wa kabiri w'uruzinduko, Perezida Kagame azifatanya na Perezida Filipe Nyusi wa Mozambique mu birori by'umunsi w'ingabo bizabera muri Sitade ya Pemba.

Umutekano ni wose muri Cabo Delgado