Paris: U Rwanda rwakiriwe nk'umunyamuryango wa OECD

U Rwanda rwakiriwe nk'umunyamuryango mushya w'ihuriro ry'iterambere rishingiye ku muryango mpuzamahanga w'ubufatanye n'iterambere ry'ubukungu, ibizwi mu ndimi z'amahanga nka OECD Development Center, kuri uyu wa Kabiri tariki 21 Gicurasi 2019.

U Rwanda rwakiriwe mu nama y'iri huriro iri kubera i Paris mu Bufaransa, aho u Rwanda ruhagarariwe na Ministiri w'Ubucuruzi n'Inganda Soraya Hakuziyaremye.

Ministiri Hakuziyaremye yagaragarije abateraniye muri iryo huriro ko iterambere ryagerwaho ari uko hubahirijwe uburinganire n’ubwuzuzanye  bw'abagabo n'abagore, aho yagaragaje ko mu Rwanda hejuru ya 60% by'abagize Inteko Ishinga Amategeko ari abagore.

Iri huriro OECD Development Centre ryashinzwe mu mwaka wa 1961 nk'ihuriro ryigenga rigamije ibiganiro no guhanahana ubumenyi hagati y'ibihugu bigize umuryango mpuzamahanga w'ubufatanye n'iterambere ry'ubukungu n'ibihugu biri mu iterambere, bigamije kuzamura ubukungu n'ubucuruzi ku Isi.

Kuri ubu iri huriro rigizwe n'ibihugu 54, aho u Rwanda rwabaye igihugu cya 55.