Umujyi wa Kigali ugomba gushakira umuti ikibazo cy'ikimoteri--PAC

Umuyobozi w'umugi wa Kigali avuga ko umuti urambye mu micungire y'imyanda, ari ugushyiraho uruganda ruyitunganya ikabyazwa ifumbire, amashanyarazi na gaz.

Ibi yabitangarije abadepite bagize komisiyo ishinzwe gukurikirana imikoreshereze y'imari n'umutungo by'igihugu PAC, ubwo batangaga ibisobanuro ku makosa yerekeranye n'imikoreshereze y'ingengo y'imari.

N'ubwo raporo y'umugenzuzi mukuru w'imari ya leta y'umwaka wa 2014/2015 igaragaza ko umugi wa Kigali umaze gutera intambwe mu mikoreshereze y'imari ya leta, haracyagaragara ibibazo, birimo imicungire y'imyanda, aho depite NKUSI Juvenal, perezida wa PAC yagaragaje ko ibibazo byari ku kimoteri cya Nyanza byimuriwe i Nduba, mu myaka itanu hakaba nta kirakorwa gifatika.

Ubuyobozi bw'umugi wa Kigali bwasobanuye ko ibibazo byinshi byatewe n'uko kwimura ikimoteri byakozwe mu buryo butunguranye, aho bahawe ukwezi kumwe gusa, mu ngengo y'imari ya miliyari 2 zari zikenewe hakaba harabonetse miliyoni 800 gusa.

Kuri ubu hasigaye kwimurwa imiryango igera mu ijana, ariko ituye muri metero 400 bivuze ko byubahirije amabwiriza, ariko ngo bitarenze uyu mwaka w'ingengo y'imari nabo bazaba bimuwe.

Inkuru irambuye mu mashusho: