Nyamirambo: Abarokotse Jenoside bishimiye ko inzu zabo zatangiye kuvugururwa

Abarokotse Jenoside yakorewe abatutsi batuye mu mudugudu wa Kiberinka mu murenge wa Nyamirambo akarere ka Nyarugenge barishimira ko inzu zabo zubatswe mu 1997 zatangiye gusanwa.

Uyu mudugudu wa Kiberinka ni wo mudugudu wa mbere mu Rwanda wubakiwe abarokotse Jenoside yakorewe abatutsi. Ni umudugudu ufite inzu 234 ariko muri izo nzu hari izatangiye kwangirika ku buryo zikeneye gusanwa.

Perezida wa Ibuka mu Karere ka Nyarugenge Rutayisire Masengo avuga ko ikibazo cy'inzu zikenewe kuvugururwa muri uyu mudugudu kirimo gushakirwa umuti ku bufatanye n'inzego zitandukanye.

Imyaka ishize ari 25 izi nzu zubatswe, Umuyobozi Nshingwabikorw w'Akarere ka Nyarugenge Ngabonziza Emmy avuga ko umuganda wo kuvugurura izi nzu wari ukenewe kugirango abarokotse Jenoside yakorewe Abatutsi batabonye amikoro yo kwisanira inzu batuyemo nabo babe heza.

Igikorwa cy'umuganda muri uyu mudugudu wa Kiberinka cyanitabiriwe n'ubuyobozi bwa ambasade ya Maroc mu Rwanda aho iyi ambasade yatanze imifuka ya sima igera kuri 200 izifashishwa mu bikorwa byo gusana izi nzu.

Ambasaderi wa Maroc mu Rwanda Youssef Imani avuga ko gahunda y'umuganda mu Rwanda ifite umwihariko utapfa kubona ahandi.

Muri uyu muganda, abatuye muri uyu mudugudu n'abandi baturage muri rusange, basabwe no kwihutira kwishyura ubwisungane mu kwivuza.

KWIZERA John Patrick