Nyabihu: Hatangiye gukorwa ibilometero 93 by'imihanga bizatwa miliyari 16 z'amanyarwanda

Imihanda ya kaburimbo iciriritse ireshya n'ibirometero 93 no yo irimo gukorerwa abaturage b'Akarere ka Nyabihu mu rwego rwo koroshya ubuhahirane.

Mu gihe abaturage bishimira ikorwa ryayo, Guverineri w'Intara y'Iburengerazuba Munyantwari Alphonse arabasaba gukuba kenshi umusaruro bari bafite ngo bazabyaze umusaruro iyi mihanda.

Ku musozi wa Kibisabo wo mu Murenge wa Rambura mu Karere ka Nyabihu ni ho hatangirijwe ku mugaragaro gahunda yo gukora imihanda 6 ireshya n'ibirometero 93.Ni imihanda abaturage bavuga ko yari ikenewe cyane kuko ngo ari mu gace gafite umuusaruro utandukanye byabagoraga kuwugeza ku isoko no guhahirana n'abandi.

Iyi mihanda abaturage b'Akarere ka Nyabihu bemerewe n'Umukuru w'Igihugu Paul Kagame mu mwaka wa 2018 izakorwa n'Ikigo cy'Igihugu gishinzwe iterambere ry'ubwikorezi RTDA ku nkunga ya Banki y'Isi.

Umuyobozi Mukuru wungirije wa RTDA Baganizi Paul Emile avuga ko uretse Akarere ka Nyabihu hari utundi turere tw'Igihugu turimo gukorwamo imihanda nk'iyi.

Guverineri w'Intara y'Iburengerazuba, Munyentwari Alphonse watangije ikorwa ry'iyi mihanda ku mugaragaro arasaba abaturage gukuba kenshi umusaruro w'ibyo bakoraga kugira ngo iyi mihanda izarusheho kubyazwa umusaruro.

Biteganijwe ko iyi mihanda izuzura mu gihe cy'amezi 15 ikazatwara akayabo ka miliyari zisaga 16 z'amafaranga y'u Rwanda.