Mu minsi 3 icyuzi cya Ruramira kirimo imibiri y'abatutsi bishwe muri jenoside kiraba cyakamijwe

Icyuzi gihangano cya Ruramira mu Karere ka Kayonza mu minsi itatu kiraba cyakamijwe kugira ngo haboneke imibiri y'abazize Jenoside yakorewe Abatutsi. Ni imibiri imazemo imyaka 26 harabuze uko ivamo.

Ibi ni ibitangazwa  na Engeniyeri Nkurunziza Gilbert uyoboye igikorwa cyo gukura amazi muri iki cyuzi cya Ruramira, nyuma y’aho kuri uyu wa Mbere umuyoboro munini wacukuwe kuri iki cyuzi utangiye gusohora amazi.

Umwaka ushize ni bwo hatangiye igikorwa cyo gukamya amazi mu cyuzi cya Ruramira, ariko aho kugabanuka akarushaho kwiyongera.Hakoreshwaga imashini zikurura amazi, nyuma haje gucibwa umuyoboro munini. Igikorwa kimaze ibyumweru bibiri.

Abacitse ku icumu mu Murenge wa Ruramira barimo Perezida wa Ibuka muri uyu Nziyoroshya Elisa baravuga ko icyizere ari cyose ko imibiri y'ababo igiye kuboneka igakurwamo.

Perezida wa IBUKA muri uyu murenge avuga  ko muri iki cyuzi hashobora kuba harimo imibiri ibarirwa mu bihumbi 30 y'abatutsi bajugunywemo. Bakaba ari abo mu mirenge ikikije iki cyuzi ndetse n’abari barahahungiye. Kuva hatangira igikorwa cyo kuyikuramo hamaze gukurwamo imibiri ibarirwa muri 50.