Mu ishuri rikuru rya Gisirikare i Musanze hizihirijwe umunsi mukuru wo kumurika umuco

Mu ishuri rikuru rya Gisirikare i Musanze hizihirijwe ku nshuro ya 6 umunsi mukuru wo kumurika umuco, ni igikorwa buri gihugu kimurikiramo ibiribwa, ibinyobwa, imyambarire, amateka yihariye ndetse n'intwari zacyo.

Ni umunsi ngarukamwaka wizihijwe n'abasirikari bakuru baryigamo bakomoka mu bihugu 11.

Muri ibi birori biyobowe na Brig. Gen Ndahiro Didace, mu izina ry'abasirikare n'abapolisi b'abanyeshuri baryigamo Lt Col Callixte Migabo yagaragaje ko uyu munsi ubibutsa ko Abanyafurika ari abavandimwe. 

Yagaragaje ko uyu munsi utuma bibuka isano bafitanye n'ibihugu byabo, ndetse bakanatekereza ku musanzu basabwa mu kubiteza imbere.

Uyu munsi wizihijwe ku nshuro ya gatandatu hari hashize imyaka ibiri ibirori byawo bititabirwa n'abandi bantu uretse ababiteguraga, kubera icyorezo cya COVID-19 cyari cyarabikomye mu nkokora.

Kuri iyi nshuro abasirikare n'abapolisi bari mu masomo bitabiriye uyu munsi ni 48 barimo abanyarwanda 31 n'abanyamahanga 17.