Mu Rwanda hari kubera inama ya ITU irebana n'iterambere ry'ikoranabuhanga

Ibihugu by'Afurika bikangurirwa guhuriza hamwe imbaraga kugira ngo ikoranabuhanga rikomeze kugira uruhare mu iterambere ryabyo.

I Kigali hatangiye inama mpuzamahanga ihuje ibihugu byibumbiye mu muryango mpuzamahanga ushinzwe guhuza ibikorwa by’iterambere mu itumanaho (ITU) ku rwego rw’akarere ka Afurika hagamijwe kwisuzuma nka Afurika mu by'itumanaho.

Abahagarariye inzego zitandukanye zikora mu birebana n'ikoranabuhanga mu bihugu biri muri uyu muryango mpuzamahanga w'itumanaho mu karere k'Afurika, barimo kurebera hamwe icyakorwa kugira ngo ikoranabuhanga rirusheho gucengera muri Afurika kandi rigire uruhare mu iterambere ry'umugabane w'Afurika.

Andrew Rugege uyobora umuryango ITU ku rwego rw'Afurika asobanura ko ikoranabuhanga rikwiye kurushaho gushyirwamo ingufu bitewe n'akamaro rigira mu buzima bw'abaturage.

Umuyobozi ushinzwe iterambere ry'itumanaho muri ITU, Brahima Sanou, avuga ko ibyo u Rwanda rumaze kugeraho mu birebana n'ikoranabuhanga bikwiye kubera urugero ibindi bihugu.

Ministre w'urubyiruko n'ikoranabuhanga Jean Philbert Nsengimana we avuga ko umusaruro uva mu nama ku ikoranabuhanga u Rwanda rukomeje kwakira, ugenda urushaho kwiyongera.