Mu Mirenge y’Umujyi wa Kigali hatangijwe ubukangurambaga bwihariye bwo kurwanya COVID19

Mu Mirenge y’Umujyi wa Kigali, hatangijwe ubukangurambaga bwihariye buzamara ukwezi bwo kurwanya no gukumira  icyorezo cya COVID19, aho Umurenge uzahiga indi uzahabwa  igihembo cy’imodoka na Polisi y’u Rwanda ku bufatanye n’Umujyi wa Kigali.

Ubu bukangurambaga bwihariye bwo kurwanya no gukumira icyorezo cya COVID19, bwatangirijwe mu Mirenge yose y’Umujyi wa Kigali.

Umurenge wa Niboye bifashishije utudege tutagendamo abapilote kugira ngo hatangwe ubutumwa ahahurira abantu benshi, nko mu masoko, ku bigo by’amashuri n’ahandi.

Bamwe mu batuye mu Mirenge itandukanye y’Umujyi wa Kigali, bavuga ko ubu bukangurambaga buje ari igisubizo kuko hari abari baramaze kwirara bavuga ko bakingiwe ndetse n’imibare y’abandura yagabanutse.

Abanyamabanga nshingwabikorwa b’imirenge bavuga ko n’ubwo aya ari amarushanwa, ariko bizamura n’imyumvire y’abaturage, bongere kwibutswa ko icyorezo cya COVID19 ntaho cyagiye.

Aba bayobozi basinyanye imihigo n’abakuru b’imidugudu, mutwarasibo, ndetse n’abayobozi b’utugari ku buryo utazashyira mu bikorwa ibyo yiyemeje mu guhangana na COVID19 azabibazwa.

Ubu bukangurambaga bwatangijwe kuri uyu wa Mbere Taliki ya 13 Nzeri, buzasozwa Taliki ya 19 Ukwakira 2021 hatangwa imodoka ku murenge wahize iyindi mu kugabanya no gukumira COVID19.

Jean Paul Turatsinze