Minisitiri w’Intebe Dr Ngirente yitabiriye inama ngarukamwaka y’Umuryango Concordia

Kuri uyu wa Gatatu, Minisitiri w’intebe Dr Edouard Ngirente yahagarariye Perezida Kagame mu nama ngarukamwaka y’umuryango mpuzamahanga, Concordia uharanira iterambere ry’imibereho myiza.  

Ubwo yegezaga ijambo ku bitabiriye iyi nama, Minisitiri w’Intebe, Dr Ngirente yavuze ko ibibazo byugarije Afurika muri iki gihe, bisaba imyumvire mishya kubera ibibazo byatewe na Covid 19, bisaba ingufu mu iterambere ry’inganda n’ibikorwaremezo.

Yagize ati “Ibibazo Afurika ihanganye na byo muri iki gihe birasaba imyumvire mishya. Iki cyorezo cya Covid 19 cyagaragaje ko Afurika ikeneye kwigira biruseho mu gushyiraho ingamba zihamye mu rwego rw’inganda n’ibikorwa remezo. Mu ibi biganiro ndashaka kubasangiza amasomo u Rwanda rwakuye mu kwigira mu rwego rw’inganda n’ibikorwaremezo.”

“Ni amasomo twakubira mu bintu 3 by’ingenzi aribyo kongerera ubushobozi urwego rw’abikorera rukaba ku isonga mu iterambere ry’ubukungu ku buryo burambye, guteza imbere ibyo guhanga udushya n’ikoranabuhanga kimwe no kurushaho gushyigikira impinduka mu bijyanye n’inganda n’ibindi bikorwa twahisemo.’’

Minisitiri w’intebe yanabwiye abitabiriye iyi nama ko mu Rwanda havuguruwe itegeko rituma habaho  imikoranire myiza hagati ya Leta n’abikorera, hagamijwe korohereza ishoramari.

“Mu mwaka wa 2016, guverinoma y’u Rwanda yavuguruye itegeko rigena imikoranire ya Leta n‘abikorera. Ubu ni bumwe mu buryo bugena igenzurwa ndetse n’imyubakire y’iyo mikoranire hagamijwe kubaka imikoranire isobanutse, inyuze mu mucyo kandi yorohereza abashoramari. Imikoranire myiza hagati ya Leta n’abikorera twabigize ishingiro ry’ahazaza h’ubukungu bw’u Rwanda.”

 “Ubu u Rwanda rurimo kubaka ikoranabuhanga riruhuza n’isi mu bijyanye n’iterambere ry’ubucuruzi, leta y’u Rwanda kandi yubatse ibyambu bifasha mu bwikorezi bw’Ibicuruzwa.”

Yavuze ko iki cyambu cyatangijwe mu kwakira 2019, kuri ubu kikaba gikora ndetse hari n’imirimo yo kucyagura.