Minisitiri w'Intebe yakiriye umuyobozi mukuru w'ikigo Dogus group

Ku gicamunsi cyo kuri uyu wa Kabiri, Minisitiri w'Intebe, Dr Édouard Ngirente yakiriye umuyobozi mukuru w'ikigo mpuzamahanga cy'ubucuruzi, Dogus group cyo muri Turukiya ariwe, Ferit Şahenk bagirana ibiganiro byagarutse ku bushake bw'ubuyobozi bw'iyi sosiyete ku gushora imari mu Rwanda.

Ni inshuro ya 3 Ferit Şahenk asuye u Rwanda, avuga ko ibiganiro yagiranye na Minisitiri w'Intebe byibanze ku bijyanye n'ishoramari ikigo abereye umuyobozi gishaka gushora imari mu Rwanda.

Umuyobozi wa Dogus group avuga ko ikubitiro bazahera mu bukerarugendo bubaka Hotel igezweho mu Mujyi wa Kigali.

Umuyobozi Mukuru w'Urwego rw'Igihugu rw'Iterambere, Claire Akamanzi avuga ko kuba abashoramari nk'aba bakomeye ku rwego rw'isi bagaragaza ubushake bwo gushora imari mu Rwanda ari ikimenyetso kiza ku ishoramari mu gihugu.

Dogus group yatangiye ibikorwa byayo mu mwaka wa 1951, gifite company zigera kuri 300 zikora mu bukerarugendo, ubwubatsi, iby'ingufu n'itangazamakuru.

Ubu Company za Dogus Group zikorera mu bihugu 29 hirya no hino ku isi, ubushize ubwo umuyobozi w'iki kigo yasuraga u Rwanda bikaba byari mu gihe cy'inama y'abakuru b'ibihugu na za guverinoma biri mu muryango wa Commonwealth.