Minisitiri Twagirayezu avuga ko harimo gukorwa amavugurura mu burezi agamije kubaka uru rwego

Abanyeshuri basoje amasomo muri Kaminuza y’u Rwanda baravuga ko bataje kuba abashomeri, ahubwo ngo bagiye kwifashisha ubumenyi bakuye ku ntebe y’ishuri bafatanye n’abandi guteza imbere igihugu.

Byari ibirori bibereye ijisho muri stade Ubworoherane, nubwo imvura yaguye, ariko ntabwo yakomye mu nkokora uyu muhango.
Mu byishimo byinshi, abanyeshuri bishimiye impamyabumenyi bahawe.

Ndereyimana Alphonsine wo mu Karere ka Rulindo, yishimiye ko umwana we w’ikinege yarangije ikiciro cya 2 cya Kaminuza.
We na bagenzi be bavuga ko hari byinshi biteze ku bana babo.

Minisitri w’Uburezi, Twagirayezu Gaspard yashimiye umuhate waranze abasoje amasomo maze ashimangira ko hari gukorwa amavugurura menshi mu burezi agamije kubaka uru rwego ngo rurusheho kuba umusingi w’iterambere ry’igihugu.

Ni ku nshuro ya 9 uyu muhango wo guha impamyabumenyi abanyeshuri muri Kaminuza y’u Rwanda ubaye.
Mu barenga ibihumbi umunani bazishyikirijwe uyu munsi, abize uburezi ni 3471.
Bibaye ubwa mbere haboneka umubare munini w’abahawe impamyabumenyi y’ikirenga (PHD) kuko ari 38, ibishimangira ko Kaminuza y’u Rwanda imaze kuba ubukombe.

Mbarushimana Pio