Minisitiri Ngabitsinze yagaragarije abacuruzi ba Dubai ko mu Rwanda ari ahantu heza ho gushora imari

Ubuyobozi bw’urwego rw’ubucuruzi rwa Dubai, Dubai Chamber buvuga ko bwiteguye kwagura ubucuruzi n’u Rwanda nk’igicumbi cy’ubucuruzi n’ishoramari mu karere. 

Byagarutsweho mu biganiro bihuza abikorera bo mu Rwanda na bagenzi babo bo muri Dubai byabereye i Kigali kuri uyu wa Mbere.

Minisitiri w’Ubucuru n’Inganda, Dr Jean Chrysostome Ngabitsinze yibukije abari muri ibi biganiro ko u Rwanda na Dubai bafitanye imikoranire myiza yorohereza abacuruzi b’impande zombi mu bikorwa byabo.
Yagaragaje ko u Rwanda ari ahantu habereye ishoramari nk’uko ibyegeranyo mpuzamahanga bibigaragaza. Abagize urwego rw’abacuruzi muri Dubai nabo bagaragarije abikorera bo mu Rwanda amahirwe ari muri uyu murwa w’ubucuruzi ku isi.  

Dubai Chamber yazanye na Kompanyi z’ubucuruzi zigera muri 18 aho zireba amahirwe mu ishoramari ari mu nzego zinyuranye mu Rwanda. 

Mu gihe abacuruzi bo mu Rwanda bakura i Dubai ibikoresho byakorewe mu nganda birimo iby’ikoranabuhanga n’ibindi byifashishwa mu nganda, u Rwanda rwoherezayo byinshi bikomoka ku musaruro w’ubuhinzi nk’Ikawa, Icyayi, amabuye y’agaciro n’ibindi.