Minisiteri y’Uburezi yavuze ko leta izashyira imbaraga muri gahunda ya Girinka Mwarimu

Minisitiri w'Uburezi, Dr Valentine Uwamariya yibukije abitabiriye umunsi wa mwarimu ko uburezi ari inkingi y'Amajyambere, ko ibihugu byose byageze ku iterambere birikesha uburezi buhamye.

Yavuze ko mu rwego rwo kugabanya ubucucike mu mashuri hubatswe ibyumba ibihumbi 22 mu gihugu, mu gufasha mwarimu  leta ikazashyira imbaraga muri gahunda ya girinka mwarimu ndetse n'inyongera y'10% ku mushahara wa mwarimu.

Mu gihe umwaka w'amashuri ugiye gutangira, abarimu barasabwa gushyira imbaraga mu kuzamura abana bigaragara ko basigaye inyuma mu masomo, no kujya bafata umwanya bakihugura cyane mu rurimi rw'Icyongereza.

Dr Uwamariya avuga ko uyu mwaka w'amashuri uzaba ari umwaka udasanzwe, ari nayo mpamvu abarimu nabo bakwiye gukora ibidasanzwe kugira ngo umunyarwanda agere ku burezi buhamye.

Ibi byose ariko ntibyagerwaho ngo ababyeyi batabigizemo uruhare basabwa kuba hafi y'abana babo bakabasubirishamo amasomo.

Ku kibazo cyagaragajwe n'uhagarariye abarimu bo mu mashuri yigenga cyo kuba batabona uburyo bwo kwishyura inguzanyo kubera ko babuze akazi, Minisitiri w'Uburezi yavuze ko bagiye kuganira Na Mwarimu Sacco kugira ngo harebwe uburyo bakoroherezwa mu kwishyura.