Minisante yavuze uburyo ukwezi kwa Kamena kwabaye kubi ku bwiyongere bwa Covid19

AGEZWEHO

  • Kuri uyu wa mbere hategerejwe isomwa ry’umwanzuro ubushinjacyaha buregamo Rusesabagina – Soma inkuru...
  • RAB yatangaje ko indwara ya muryamo yagaragaye mu ngurube zo mu Rwanda – Soma inkuru...

Minisante yavuze uburyo ukwezi kwa Kamena kwabaye kubi ku bwiyongere bwa Covid19

Yanditswe Jul, 02 2021 18:38 PM | 99,931 Views



Inzego z’ubuzima mu Rwanda ziravuga ko kuva icyorezo cya COVID19 cyagera mu Rwanda,  ukwezi gushize kwa Gatandatu ariko kwabaye kubi kurusha ikindi gihe, ari nayo mpamvu guverinoma ivuga ko mu gihe ingamba ziriho zitatanga umusaruro wifuzwa na Guma mu rugo ishobora kugaruka.

Hagendewe ku mibare ya buri munsi y’abandura n'abahitanwa n’icyorezo cya COVID19 mu Rwanda, usanga ukwezi gushize kwa Kamena kwarabonetsemo abanduye bashya n’abahitanwa n’icyorezo cya COVID19 kurusha ikindi gihe.

Imibare y’inzego z’ubuzima igaragaza ko muri Kamena igipimo cy’ubwandu cyavuye kuri 1.4% cyigera kuri 8.8%, kuko abanduye bavuye ku 27 023 tariki ya 1  bagera ku 39 047 tariki 30, bivuze ko mu minsi 30 gusa habonetse abagera ku 12 024 banduye COVID19.

Ni mu gihe kandi muri uko kwezi konyine iki cyorezo cyahitanye abagera kuri 81.

Minisitiri w’ubuzima Dr. Daniel Ngamije avuga ko igiteye impungenge kurushaho, ari ubwiyongere bw’abarwayi bagaragaza ibimenyetso ndetse bikarangira bagiye mu bitaro bitandukanye n’uko byahoze mbere, aho wasangaga 10% gusa ari bo bagaragaza ibimenyetso.

Yagize ati “Abenshi bageze kuri 50% bari kwisuzumishiriza mu bigo nderabuzima, mu bitaro no mu mavuriro yigenga. Ni ukuvuga ngo ava mu rugo afite ikibazo gituma ajya kwisuzumisha. Igikurikira rero ni uko n’umubare w’abinjijwe mu bitaro muri iyi minsi nawo wagiye wiyongera.”

“Iyo urebye imibare ukuntu yagiye izamuka muri uku kwezi kose kwa Kamena nk’aho tuvurira abantu COVID19 mu bitaro bya Nyarugenge, usanga dutangira ukwezi kwa Gatandatu twari dufite abarwayi badasaga 20, uyu munsi wa none dufiteyo abarwayi basaga 127. Iyo bagezemo nabwo rero abenshi turi kubona bakeneye umwuka. Umwuka twakoreshaga nawo muri biriya bitaro umuntu arabona ko ibipimo byiyongereye inshuro zigeze ku 10.”

“Icya nyuma ni abapfa bazize COVID, ntabwo twaherukaga imibare y’abantu 7, 8, 9 bapfuye ku munsi noneho wanasesengura ugasanga mu bapfuye harimo abantu bakiri bato harimo nk’abantu bafite imyaka 40, 39 kandi nta kindi kibazo cy’ubuzima yari asanganywe ngo uvuge ko COVID yaje kumuhuhura kuko yari asanzwe afite ibibazo by’ubuzima. Ibyo byose iyo umuntu abirebeye hamwe ikibazo cya COVID kirakomeye.”

Ugereranyije ukwezi kwa 6 n’amezi 2 yakubanjirije, usanga harimo ikinyuranyo kinini, kuko nko mu kwa kane habonetse abanduye 3 198, mu kwa 5 haboneka 1 738, bivuze ko muri ayo mezi yombi habonetse 4 936 bangana na 41% gusa y’ababonetse mu kwezi kwa 6 konyine.

Ni mu gihe kandi abapfuye muri ayo mezi yombi ari 45 bangana na 55% by’abapfuye muri Kamena.  

Inzobere mu ndwara z’ibyorezo akaba anakora mu ishami ry’umuryango w’abibumbye ryita ku buzima mu Rwanda Dr. Vedaste Ndahindwa avuga ko kuva iki cyorezo cyakwaduka mu Isi, u Rwanda atari cyo gihugu cya mbere gihuye n’iki kibazo.

Ati “Ngirango mu Rwanda tumaze kubona ko ubu Kigali turimo kugera ku mibare tutigeze tugira mbere ariko ntitwavuga ko ari ubwa mbere habonetse imibare myinshi ku Isi, hari ibihugu bibona ibihumbi Magana ku munsi. Ariko ku bwacu ni imibare iri hejuru cyane, iteye inkeke kandi tutakwifuza ko ikomeza kwiyongera.”

Ni nayo mpamvu mu kwezi kwa 6 ingamba zo guhangana n’iki cyorezo zavuguruwe inshuro zigera kuri 4 zose, amasaha yo kugera mu rugo ava saa yine z’ijoro ashyirwa saa kumi n’ebyiri ndetse hashyirwaho na gahunda ya Guma mu karere.

Gusa Minisitiri w’Intebe Dr. Edouard Ngirente avuga ko izo ngamba zitagize icyo zitanga, na Guma mu rugo yakwitabazwa.

Yagize ati “Mu by’ukuri iki cyorezo nta muntu wavuga ngo arakingenzura, niwe ugifiteho imbaraga. Imyanzuro igenda ihinduka ariko icyiza nk’uko nabivuze ni uko n’abaturage ubwabo tugeze ku rwego navuga ngo dusigaye tubona imibare tukibwira igikurikiyeho. Ikindi navuga tureba urwego rw’ubuzima tukanareba n’ubuzima busanzwe bw’abaturage, imibereho. Abaturage barabaho bate? Abo bahoze bandika ngo muturinde lockdown; ntabwo ari ukuvuga ngo muyiturinde nkaho ari leta ibafatira lockdown! Tubishyira ku munzani tukareba ngo ese iyo lockdown ibaye biragira izihe ngaruka no ku mibereho isanzwe. Bivuze rero ngo dukomeze twirinde n’iyo lockdown ishobora kuzongera ikaba bitewe n’uko imibare yazamutse.”

Kugeza ubu mu Rwanda abakabakaba ibihumbi 400 gusa nibo bamaze guhabwa urukingo rwa COVID19, gusa kuva muri uku kwezi kwa Nyakanga kugeza mu mpera z’umwaka hategerejwe izindi kuko gukingira benshi ari ho hari amizero yo koroshya ingamba no gusubira mu buzima busanzwe.

Divin Uwayo




Ba uwambere gutanga igitekerezo

Tanga igitekerezo:



RSS FEED

Uturere tugize Umujyi wa Kigali twinjiye muri gahunda yo kurwanya Covid 19

Kigali: Baritwaza ko bakingiwe ntibubahirize amabwiriza yo kwirinda COVID19

Mu Mirenge y’Umujyi wa Kigali hatangijwe ubukangurambaga bwihariye bwo kur

Sitade irimo kujyamo abantu kandi mu bipimo dufata ntiturimo kubona ko abajyamo

U Rwanda rwakuyeho akato ku bagenzi baturuka mu Buhinde no muri Uganda

U Rwanda rwakiriye doses 200.000 z'inkingo zo mu bwoko bwa Astra Zeneca