Minisante yagabanyije iminsi umuntu wanduye Covid19 ariko yarafashe inkingo zose amara mu kato

Minisiteri y’Ubuzima yagabanyije iminsi umuntu wanduye Covid19 amara yarishyize mu kato, igirwa irindwi ivuye ku 10 ku muntu wafashe inkingo z’iki cyorezo mu buryo bwuzuye.

Uyu ukaba ari umwe mu misaruro y’umubare munini w’abamaze gukingirwa ubu imibiri yabo ikaba ifite ubudahangarwa.

Ubusanzwe abajyanama b’ubuzima bafatanyije n’ibigo nderabuzima bakurikiranaga umunsi ku munsi uwanduye iki cyorezo urwariye mu rugo mu gihe cy’ iminsi icumi.

Guhera kuri uyu wa mbere ubu umuntu wikingije koronavirus byuzuye nyuma akaza kuyandura azajya amara iminsi 7 gusa mu kato, akakavamo abanje kwisuzumisha ibipimo bikerekana ko ntakoronavuris afite.

Dr Minelas Nkeshimana ukuriye itsinda rishinzwe ibijyanye n'imivurire y'abarwayi ba COVID-19 mu gihugu yagize ati "Abaturage benshi barakingiwe ku buryo barenga miliyoni 5, iyi virus iyo isanze umubiri wabo ufite ubwirinzi buri hejuru ugereranyije n'uko ibihe byashize byari bimeze, bivuze ko umubiri wabo uhangana n'iyi virus ukayihashya mu gihe gitoya, rero aho niho hava amabwiriza ahinduka umuntu akaba yahabwa amahirwe yo kwipimisha ku minsi irindwi kugira ngo niba yakize asubire mu buzima busanzwe."

Hagati aho ariko amabwiriza mashya yashyizweho na Minisiteri y’Ubuzima avuga ko umuntu ukirutse Koronavirus ariko igipimo cya PCR kigakomeza kwerekana ko agifite koronavirus mu mubiri we nyamara yanahawe icyemezo cyuko yakize, atari  ngombwa ko aguma mu kato.

"Ibindi bihugu byari byaratangiye guha icyemezo ku baturage bavuye mu kato baragakoze neza bakakarangiza n'ibimenyetso bigashira, rero iyo wipimishije Rapid test ukaba wabona utarwaye ariko PCR ikagaragaza ko ugifite virus nyuma y’iminsi icumi baguha icyo cyemezo ukakimarana iminsi 90, ariko hagati aho iyo urwaye icyo cyemezo gihita gitakaza agaciro."

Minisante igaragaza ko 98% by’abantu 14098 basanganywe Koronavirus kugeza kuri uyu wa mbere, barwariye mu rugo bityo ikaba isaba ko nubwo iminsi y’akato yagabanyijwe kubakingiwe, bagomba gukurikiza inama bahabwa na muganga kugira ngo iyo minsi ishire barakize iki cyorezo.

Fiston Felix Habineza