Mineduc yavuze ko Covid19 itahungabanyije urugero abana batsindiraho ibizamini

Minisiteri y’Uburezi iratangaza ko icyorezo cya Covid19, kitahungabanyije urugero abana batsindiraho ibizamini bisoza icyiciro cy’amashuri abanza n’icyiciro rusange cy’amashuri yisumbuye.

Mu rugo kwa Rutaganira Ntwali Yassine, buri wese mu bavandimwe n’ababyeyi baramushimira, kubera ko uyu mwana w' imyaka 12 ariwe wahize abandi mu gutsinda ibizamini bisoza amashuri abanza. Rutaganira Ntwali Yassine avuga ko mu bihe bya Covid19, atahwemye kwiga kuko yashakaga gutsinda ku rwego rwo hejuru.

Ababyeyi ba Ntwali, bavuga ko kumuba hafi mu bihe bigoye birimo no mu bihe bya Guma mu rugo, aribyo byamufashije guha umwanya amasomo ye.

Usibye Ntwali Yassine, Tumukunde Francoise we wahize abandi bana bakoze ikizamini gisoza icyiciro cya rusange  cy'amashuri yisumbuye, avuga ko nawe atahwemye gushyira umuhate kumasomo ye aribyo byamushoboje kugera ku ntego.

Mu mashuri abanza mu mwaka wa 2019%, abana bari batsinze ku cyiciro cyo hejuru bari ku kigero cya 3.8, uyu mwaka akaba ari 5.7%, mu gihe mu cyiciro rusange cy'amashuri yisumbuye abari batsinze ku rwego rwo hejuru mu mwaka wa 2019 bari 9.1% ubu mu mwaka wa 15.8%.

Minisitiri w'Uburezi, Dr. Uwamariya Valantine avuga ko muri rusange Covid19 itagize ingaruka ku mitsindire y'abanyeshuri, agashimira ababyeyi ubwitange bagaragaje muri bihe bigoye bya Covid19.

Mu mibare, Abanyeshuri batsinze amashuri abanza abatsinze ku cyiciro cya mbere ni 14,37 bangana na (5,7%), abari mu cyiciro cya kabiri ni 54,214 (21,5%),  abari mu cyiciro cya gatatu ni 75,817 (30,10%)

Muri rusange banyeshuri bakoze ibizamini bisoza amashuri abanza ni 251,906, barimo abakobwa 136,830 n'abahungu 115,076.

Mu cyiciro rusange hakoze 121,626, harimo abakobwa 66, 240 n'abahungu 55, 386.

Fiston Felix Habineza