Minaloc igiye guhagurukira ikibazo cy’amarimbi harimo no kuyazitira

AGEZWEHO

  • Suede yahaye u Rwanda inkunga ya Miliyari 8 Frw – Soma inkuru...
  • U Rwanda n'u Bushinwa byasinyanye amasezerano akuraho gusoresha kabiri ibicuruzwa – Soma inkuru...

Minaloc igiye guhagurukira ikibazo cy’amarimbi harimo no kuyazitira

Yanditswe Nov, 02 2021 18:12 PM | 120,264 Views



Minisitiri w'Ubutegetsi bw'Igihugu, Gatabazi Jean Marie Vianney yatangaje ko iyi Minisiteri yahagurukiye gukemura ibibazo bigaragara mu mitunganyirize y'amarimbi harimo kuyazitira, no guhugura komite ziyashinzwe mu nzego zibanze.

Ni nyuma y'aho hamwe mu hari amarimbi atagishyingurwamo hakagaragara imva zangiritse ku buryo zishobora guteza impanuka, abaturiye aya marimbi yaba akoreshwa n’atagikoreshwa  nabo bakagaragaza ibindi bibazo baterwa nayo.

Akayezu Theodette utuye i Rusororo yagize ati “Iri rimbi rifashwe neza abakozi baryo barikorera isuku uko bikwiye, ariko dufite ikibazo cy'udusimba tumeze tuva muri iri rimbi tudutera ku buryo ushobora guteka inkono y’ibishyimbo ugasanga twuzuyemo.”

Claude Semigabo utuye i Kanombe we yagize ati “Mbona leta yakagombye kubyitaho ikabwira ba rwiyemezamirimo kuko baba baratsindiye amasoko bakajya bahora bita kuri izo mva.”

Usibye aba baturage, mu minsi ishize abadepite bagize komisiyo y'imibereho myiza mu nteko ishinga amategeko nabo bari basabye Minisitiri w’Ubutegetsi bw’igihugu ibisobanuro ku bibazo byagaragaye mu ishyirwa mu bikorwa ry'itegeko rigena imitunganyirize n'imikoreshereze y'amarimbi, nk'uko bamwe muri bo banakomeje kubigaragaza.

Depite Murekatete Marie Theresse yagize ati  “Hari ibintu bidutera mu bihombo, ugasanga  bateguye nk’ahantu hakozwe amaterasi kugira ngo abaturage bahabyaze umusaruro ugasanga niho bashyize irimbi, ndumva izi komite zikwiye guhugurwa.”

Minisitiri Gatabazi avuga ko iyi minisiteri ikorana n'inzego zibanze by’umwihariko uturere mu gukemura ibi bibazo bikigaraga mu mitunganyirize y'amarimbi, kandi ko hazakomeza gushakishwa ibisubizo by'ibibazo byaba ibigaragazwa n’abadepite cyangwa abaturage cyane cyane hashyirwa imbaraga mu guhugura komite zishinzwe gufata neza amarimbi.

Ati “Twemeje ko uturere tugomba guhugura izo komite, kandi Minisiteri ikazakurikirana iki gikorwa tukamenya neza niba zarahuguwe, tukabikorera Raporo namwe muzabonera kopi.”

By’umwihariko ku kibazo cy'amarimbi atazitiye, Minisitiri Gatabazi avuga ko uko ubushobozi buzagenda buboneka iki ari kimwe mu bizashyirwa imbere.

‘’Turabizeza ko uko ubushobozi bugenda buboneka tubona n’ingengo y' imari, tuzagenda turushaho kuyazitira Nta kabuza.”

Mu Rwanda habarurwa amarimbi 1439, muri yo agera ku 307 niyo yonyine azitiye, mu gihe 1132 ataziriye, ni mu gihe hari imirenge 91 idafite amarimbi kandi iyi ministeri igaragaza ko kutabona amarimbi hafi ari imwe mu mpamvu zo kuba hakiri abaturage bagishyingura mu ngo.

Fiston Felix Habineza



Ba uwambere gutanga igitekerezo

Tanga igitekerezo:



RSS FEED

Suede yahaye u Rwanda inkunga ya Miliyari 8 Frw

Perezida Kagame yageze i Dar es Salaam muri Tanzania

U Rwanda n'u Bushinwa byasinyanye amasezerano akuraho gusoresha kabiri ibi

Urukiko rw'ikirenga rurasaba abaturage kudatanga ruswa kugirango babone ser

Dr Nsanzimana uyobora RBC yahagaritswe

Dr Ndagijimana yavuze ku izamuka ry’ubukungu ku gipimo cya 10.2% n'uk