MINISANTE na Polisi baramara impungenge abaturage bibaza ko abatwara amakamyo bakwirakwiza COVID19

Minisiteri y’ubuzima na Polisi  y’igihugu baramara impungenge abaturage bibaza niba abatwara amakamyo yinjira mu gihugu batabazanira icyorezo cya COVID-19.

Izi nzego zemeza ko abo bashoferi bakurikiranwa cyane nyuma yo gupimirwa ku mipaka binjiriraho kugeza basohotse mu gihugu.

Hirya no hino ku mipaka ihuza u Rwanda n’ibindi bihugu hagaragara urujya n’uruza rw’amakamyo atwaye ibicuruzwa binyuranye bizanywe mu Rwanda cyangwa byambukiranya igihugu bijya mu bihugu by’ibituranyi.

Hari bamwe mu baturage bafitiye impungenge abo bashoferi bibaza uburyo bakurikiranwa kugira ngo batagira uruhare mu gukwirakwiza Covid19.

Umuyobozi Mukuru mu ishyirahamwe ry’abatumiza ibikomoka kuri peterole Dr. Joseph Akumuntu avuga ko aba bashoferi binjira bapimwe ndetse abagaragaweho ubwandu bakitabwaho.

Umuvugizi wa Polisi y’u Rwanda CP John Bosco Kabera avuga ko abashoferi binjira mu gihugu batwaye ayo makamyo bakurikiranwa n’inzego z’umutekano.

Minisitiri w’Ubuzima Dr. Ngamije Daniel avuga ko nyuma yo gupima abatwara amakamyo bacyinjira ku mipaka, hari n’utwuma dushyirwa ku modoka zabo twerekana aho igiye hose tuzwi nka GPS, ku buryo uyitwaye adashobora guhagarara no kujya aho abonye hose.

Umupaka wa Rusumo wonyine winjiriraho amakamyo angana na 99% y’azana n’anyuza ibicuruzwa mu Rwanda. Ku munsi haca amakamyo abarizwa hagati ya 350 na 450.